ने. सं. ११४४ कौलाथ्व चौथी -

मौसमया जानकारी कायेत न्हिं नीद्वःया बेलुन

येँ – जल तथा मौसम विज्ञान विभागं देय्या मौसम सम्बन्धी जानकारीयात व्यवस्थित व प्रभावकारी दयेकीगु जूगु दु । विभागं देय्या मौसमी सूचना प्रणालीयात प्रभावकारी व व्यवस्थित यायेत न्हियान्हिथं बेलुन ब्वयेकीगु जूगु दु । विभागं थुगु ज्याया निंतिं न्हिं नीद्वः बराबरया मौसमी बेलुन ब्वयेका वयाच्वंगु दु ।

विभागया महानिर्देशक डा। ऋषिराम शर्माया कथं येँया दक्षिण भेगय् लाःगु किपुलिं न्हियान्हिथं सनिलया ५ः३० ताः इलय् उकथं मौसमी बेलुन ब्वयेकेगु याना वयाच्वंगु दु । उकथं ब्वयेकूगु मौसमी बेलुन ३१ दलशमलव ६ किलोमिटर च्वथ्यंक थहां वनाः सुथसिया ९ ताःइलय्तक येँ व नुवाकोट जःखःया लागाय् कुतुं वयेगु यानाच्वंगु विभागं जानकारी बिउगु दु ।

विभागं न्हियान्हिथं ब्वयेका च्वंगु मौसमी बेलुन हाइड्रोजन ग्यासयुक्त खः । उगु बेलुन च्वय् थहां वनीगु इलय् फय्या न्यून चापया कारणं तग्वः जुया वनीगु व छगू निश्चित उचाइलय् थ्यनेवं तज्याइ । उर्जा, जलस्रोत व सिँचाइ मन्त्रालय अन्तर्गतया जल तथा मौमस विज्ञान विभाग व त्रिभुवन विश्वविद्यालय, जल तथा मौसम विज्ञान केन्द्रीय विभागया सहकार्यय् विभागं वंगु असार ६ गतेनिसें बेलुन ब्वयेकेगु याना वयाच्वंगु खः ।

बेलुनय् छगू विशेषकथंया ‘सेन्सर’ जडान यानाः ब्वयेकेगु व उकिं नियमित रुपं मौसम सम्बन्धी तथ्यांक छ्वया हइगु महानिर्देशक शर्मां जानकारी बियादिल । थौंकन्हय् अनुमानया भरय् मनसुनया जानकारी बीगु ज्या जुयाच्वंगुलिइ आः वइगु दिनय् बेलुनया प्रयोगं अझ अप्वः विश्वस्त जुइगु थाय् दइगु वय्कःया दावी दु ।

सेन्सर जडान यानातःगु बेलुनं प्रत्येक सेकेन्डय् उच्च वायुमण्डलया तापक्रम, फय्या गति, दिशा व सापेक्षिक आद्र्रता बारे नं जानकारी बीगु व उकिया हे लिधंसाय् मौसमया पूर्वानुमान यायेगु याना वयाच्वंगु दु ।

बेलुन छगू निश्चित उचाइलय् थ्यंकाः तज्यायेवं कुतुं वइगु इलय् उकी घाकातःगु प्यारासुटया माध्यमं बुलुहुं कुहां वइ । गुकिं यानाः जोखिम नं तसकं म्हो जक दइ । थुकथं मौसमया जानकारी कायेत प्रयोग याःगु बेलुन तज्यानाः गुगुं नं थासय् कुतुं वल धाःसा वा सुनां नं लुइकल धाःसा उकियात विभागय् थ्यंका बीत वा सम्पर्कतय्त नं विभागं सकसितं इनाप याःगु दु ।