सरकार विरुद्ध ज्याझ्वःत तीव्र

सरकारयात अधिनायकवादी जूगु द्वपं

येँ – देशय् ब्वलंगु थीथी घटनाक्रमया कारणं प्रधानमन्त्री केपी व वय्कःया सरकारय् च्वंपिं मन्त्रीतय्त ‘अधिनायकवादी’ जूगु द्वपं बीगु ज्या व्यापक रुपं न्ह्याना वःगु दु । प्रतिपक्षी नेपाली कांग्रेसं आः सरकार विरुद्ध सदन, सतक, सञ्चार व सामाजिक सञ्जाल तकं प्रयोग यायेगु जुइ धकाः निर्णय यायेवं हे देय्न्यंकं सरकार विरुद्ध ज्याझ्वःत याना वनेगु क्रम सुरु जूगु खः ।

सरकारं आः नकतिनि खारेज याःगु चिकित्सा शिक्षा अध्यादेश विरुद्ध जुम्लाय् वनाः अनसन च्वनादीम्ह डा. गोविन्द केसीया मागयात वेवास्ता याःगुलिं सामाजिक ख्यलं नं सरकारया कडा विरोध याना हःगु दु । अथे हे नेपाली कांग्रेसया सरकारं नियुक्त याना तःपिं फुकसितं लिकया छ्वयेगु सरकारी निर्णयया कारणं प्रमुख प्रतिपक्षी नेपाली कांग्रेस पूवंक हे तम्वःगु दु ।

लिसें काय स्याःपिं अपराधीयात ज्वनेमाः धकाः अनसन च्वनादीम्ह गंगामाया अधिकारीया मुद्दायात सम्बोधन या धकाः सरकारयात अन्तर्राष्ट्रिय दबाब समेत वःगु दु । उकी संलग्न ‘अभियुक्त’ छबिलाल भुसालयात सरकारं ज्वंगु दुसा थुकिं यानाः पूर्व माओवादी खेमाय् असन्तुष्टी ब्वलंगु दु ।

थ्वहे झ्वलय् आः कांग्रेसं नियुक्त याःपिं फुकसितं लिकायेधुंकाः अन जुइगु न्हूगु नियुक्तिया लागिं सु सु वनेगु धइगु खँय् नं पार्टी दुने व्यापक दौडधुप सुरु जूगु दु । थुकी नं पूर्व एमाले व माओवादी दथुइ समान भागबन्डाया खँ सुरु जुइधुंकूगु दावी सरकारं याःगु दु । यदि थुकी सन्तुलन मजुल धाःसा पार्टी दुनेहे कचवं वयेफुगु खँ नं धाःगु दु ।

नेवि संघया प्रदर्शन
प्रमुख प्रतिपक्षी दल नेपाली कांग्रेस सम्बद्ध नेपाल विद्यार्थीं संघं सरकार विरुद्ध माइतीघर मण्डलाय् म्हिगः प्रदर्शन याःगु दु । प्रदर्शनया झ्वलय् विद्यार्थीतय्सं ज्वनावःगु प्लेकार्डय् प्रधानमन्त्री केपी ओली शर्माया छ्यनय् श्रीपेच पुइकातःगु किपा तयातःगु ख ः।

प्रदर्शन लिपा सम्बोधन यायेगु झ्वलय् नेविसंघया अध्यक्ष नैनसिंह महरां सरकारं जनविरोधी निर्णय याःगु व सर्वसत्तावाद क्वचिनेत स्वःगु धासें सडक आन्दोलनय् कुहां वयागु धयादिल । वय्कलं सरकारं थःपिनिगु निर्णय भिंकेगु ज्या मयात धाःसा आन्दोलनयात तच्वयेका यंकेगु ख्याच्वः नं बियादीगु दु ।

साउन १ गते निसें थीथी थासय् निषेधित क्षेत्र क्वःछिउगु, संस्कृत विश्वविद्यालयया उपकूलपतियात क्यानाडा वनेगु ज्याय् पंगः थंगु, डा. गोविन्द केसी व गंगामाया अधिकारीया माग सम्बोधन यायेत चिउताः मतःगुलिं थ्व प्रदर्शन यानागु खँ उमिसं धाःगु दु ।

सम्बन्धित बुखँ

LEAVE YOUR COMMENTS