त्रिकोणात्मक टी–२०सिरिज : नेपाः हाकनं फाइनलय् पराजित
एजेन्सी- हङ्गकङ्गय् जुयाच्वंगु टी–२० सिरिजया फाइनलय् नेपाः पीएनजीलिसे पराजित जूगु दु । हंगकंगया टिन कोङ रोड मैदानय् जूगु फाइनल कासाय् पीएनजीं
नेपाःयात ८६ रनया तःधंगु अन्तर बुकाः उपाधि त्याकूगु खः । नेपाः धाःसा झ्वःलाक स्वक्वगुखुसी फाइनल कासाय् पराजित जूगु दु ।
थ्वयां न्ह्यः टियु मैदानय् नेदरल्याण्ड्सलिसे जूगु टी–२० सिरिजया फाइनलय् पराजित जूगु खः । अथेहे टियुलय् हे जूगु विश्वकप क्वालिफायरया फाइनल कासाय् नं नेपाः ओमानलिसे पराजित जूगु खः ।
कासाय् न्हापां ब्याटिङ याःगु पीएनजीं निर्धारित २० ओभरय् च्यागू विकेटया क्षतिइ १७१ रन दयेकूगु खः । पीएनजीया निंतिं टोनी उरां दकलय् अप्वः ६१ रन दयेकूगु खः । अथेहे एली नाआें ३० रन, हिला भारें १८ रन व चाड सोपरं १३ रन दयेकूगु खः । नेपाःया निंतिं कुशल भुर्तेल व आकाश चन्दं स्वंगू स्वंगू विकेट काःगु खः । अथेहे करण केसी व गुलशन झां छगू छगू विकेट काःगु खः ।
पीएनजीं बिउगु १७२ रनया लक्ष्य ज्वनाः मैदानय् वःगु नेपाः मुक्कं ८५ रन जक दयेकाः अलआउट जूगु खः । नेपाःया सुं नं कासामितय्सं पीएनजीया बलर विरुद्ध बांलाःगु प्रदर्शन यायेमफूगु खः । नेपाःया कुशल भुर्तेल ५ रन, विनोद भण्डारी ४ रन, कप्तान रोहित पौडेल १२ रन, गुलशन झा ६ रन, आरिफ शेख १५ रन, सन्दीप जोरा १७ रन, विवेक यादव १ रन, लोकेश बम ६ रन, करण केसी ३ रन व प्रतिश जिसी शून्य रनय् आउट जूगु खः । पीएनजीया निंतिं काबुआ मोरिया, सिसी बाउ, अले नाओ, सेमो कमिया व चाड सोपरं निगू निगू विकेट काःगु खः । नेपालं मंगलवाः जूगु समुह चरणया कासा पीएनजीयात ८५ रन बुकाः फाइनलय् थाय् दयेकूगु खः ।
LEAVE YOUR COMMENTS