पुस २७ गते विदाया विरोध
येँ (नेपालभाषा टाइम्स)- नेपाल आदिवासी जनजाति महासंघं सरकारं कन्हय् बीगु धकाः घोषणा यानातःगु पृथ्वी जयन्ती व राष्ट्रिय एकता दिवसय् सार्वजनिक बिदा बीगु प्रस्ताव लागू मयायेत माग याःगु दु । महासंघया अध्यक्ष गेल्जे लामा शेर्पा नेतृत्वया पुचलं म्हिगः प्रधानमन्त्री पुष्पकमल दाहालयात ज्ञापन पौ बिसें उगु माग याःगु खः ।
म्हिगः प्रधानमन्त्री दाहालयात लःल्हाःगु ज्ञापन पतिइ धयातःगु दु, ‘पुस २७ गते पृथ्वी जयन्तीया रुपय् राष्ट्रिय एकता दिवस न्यायेकेगु व उगु न्हि कुन्हु सरकारं सार्वजनिक बिदा बीगु निर्णय प्रति महासंघया गम्भीर ध्यानाकर्षय जूगु दु, देय् संघीय लोकतान्त्रिक गणतन्त्र संस्थागत जुइधुंकाः नं राजा महाराजाया जन्म न्हियात राष्ट्रिय एकता दिवसया रुपय् न्यायेकेगु राजतन्त्रया हे भक्ति यायेगु थें जिमिगु ठहर दु ।’
सरकारया निर्णयं ऐतिहासिक जनआन्दोलन, जनयुद्ध, मधेश विद्रोह व आदिवासी जनजाति आन्दोलनं चूलाःगु उपलब्धीत गणतन्त्र, संघीयता, धर्मनिरपेक्षता व समानुपातिक÷समावेशी व्यवस्थायात हाथ्या अप्वःगु खँ नं महासंघया विज्ञप्तिइ न्ह्यथँसें धयातःगु दु, ‘अथे जुयाः पुस २७ गते पृथ्वीनारायण शाहया जन्मन्हियात राष्ट्रिय एकता दिवसया रुपय् न्यायेकेगु व वकुन्हु सरकारी बिदा बीगु थेंज्याःगु निर्णय नेपाल सरकारं मयायेमा धकाः सम्माननीय प्रधानमन्त्रीजुयात इनाप यानाच्वना । मखुसा नेपाल आदिवासी जनजाति महासंघ थुकिया घोर प्रतिरोधय् कुहां वयेत बाध्य जुइगु ब्यहोरा नं जानकारी याकाच्वना ।’
एमाले उपाध्यक्ष लिसे उपप्रधान– मन्त्री विष्णु पौडेल नेतृत्वया कार्यदलं तयार याःगु न्यूनतम ज्याझ्वःया मस्यौदाय् नेपाःया भौगोलिक एकीकरणया ऐतिहासिकतायात लुमंकेगु व सम्मान यासें पृथ्वी जयन्तीया न्हिं पुस २७ गते सार्वजनिक बिदा बीगु प्रस्ताव यानातःगु खः । सरकारय् वनेगु नितिं राप्रपां पुस २७ गते सार्वजनिक बिदा बीमाःगु सर्त तयावयाच्वंगु खः ।
थ्वहे झ्वलय् नेवाः देय् दबुलिं नं पृथ्वी जयन्ती व राष्ट्रिय एकता दिवस न्यायेकेगु नामय् पुस २७ गते सरकारं बीत्यंगु बिदायात कयाः विरोध प्वंकूगु दु । नेवाः देय् दबूया नायः पवित्र वज्राचार्य म्हिगः विज्ञप्ति जारी यासें उगु विरोध प्वंकूगु खः ।
नेवाः देय् दबुलिं जारी याःगु विज्ञप्तिइ धयातःगु दु, ‘आदिवासी नेवाः समुदायं पृथ्वीनारायण शाहयात तसकं बर्बर, राज्य विस्तारया नितिं हिंस्रक, अमानवीय, महत्वाकांक्षी शासकया रुपय् लुमंकेगु यानाच्वंगु दु, २०६२÷६३ या जनआन्दोलनया बलं नेपालय् संघीय लोकतान्त्रिक घोषणा जुइधुंकाः राजतन्त्र व राजा महाराजाया महिमा मण्डन यायेगु युगया अन्त्य जुइधुंकूगु दु व राष्ट्रिय एकताया प्रतिकया ब्याख्याय् बहुभाषिक, बहुसांस्कृतिक, बहुधार्मिक विविधता दथुया एकता हे मू खँ खः । नेपाःया बहुलताया चरित्रयात ध्वस्त यानाः छगू भाषा, धर्म व संस्कृति क्वचिनेत मेगु भाषा, धर्म संस्कृतिइ निषेधात्मक दमनचक्र न्ह्याकूम्ह पृथ्वीनारायण शाह नेपाःमि जनताया एकताया प्रतिक किमार्थ जुइ मफइगु स्पष्ट दु ।’
उकथं हे विज्ञप्तिइ सरकारं गणितीय समर्थन कायेगु स्वार्थं प्रेरित जुयाः गठबन्धन दलया न्युनतम मंकाः नीति व ज्याझ्वः दयेकेत नीस्वंगु कार्यदलं बिदा बीत याःगु सिफारिसयात घोर भत्र्सना यासें अथे मयायेत नेपाल सरकारयात सचेत नं याकूगु दु । उगु ज्या मदिकल धाःसा गठबन्धन सरकारयात आदिवासी विरोधी घोषणा यासें संघर्षया ज्याझ्वः हयेत बाध्य जुइगु खँ नं न्ह्यथनातःगु दु ।
LEAVE YOUR COMMENTS