मंगलवाःनिसें एसीसी प्रिमियर कप

एजेन्सी- नेपालं ग्वसालय् जुइगु एसीसी प्रिमियर कप मंगलवाःनिसें शुरु जइत्यंगु दु । वैशाख ५ गतेनिसे बैशाखया १८ गतेतक जुइगु थ्व धेंधेंबल्लाःया विजेता एसिया कपया निंतिं छनोट जुइ । थ्व धेंधेंबल्लाखय् १० गू एसोसिएट देशं ब्वति काःगु दु ।

नेपाः समूह ‘ए’य् लाःगु दु । नेपाःया पुचलय् ओमान, मलेसिया, कतार व साउदी अरेबिया दु । अथेहे समुह ‘बी’इ युएइ, हङकङ, कुवेत, सिंगापुर व बहराइन दु । पुचःया निगू शीर्ष टिम सेमिफाइनलय् थाय् दयेकीगु जुइ । कासा नेपाःया टियू मैदान व मुलपानी मैदानय् जुइगु ज्याझ्वः दु । मुलपानीया क्रिकेट मैदानय् न्हापांखुुसी अन्तर्राष्ट्रिय कासा जुइत्यंगु खः । मंगलवाः जुइगु उद्घाटन कासाय् नेपालं मलेसियालिसे म्हिती । मंगलवाः हे मुलपानी मैदानय् जुइगु कासाय् हङकङ व सिंगापुरं धेंधेंबल्ला याइ ।

नेपाः एसीसी प्रिमियर कप त्याकीगु तःधंगु सम्भावना दुगु टिम खः । आइसिसि लिग–२ य् म्हितूगु लिपांगु १२ गू मध्ये ११ गू कासा त्याकूगु नेपाःया टिम इतिहासया हे बांलाःगु फर्मय् दु । मोन्टी देशाइ प्रशिक्षक जुइधुंकाः नेपाःया टिमय् तःधंगु हिउपाः वःगु खः । नेपालं घरेलु मैदाय् म्हितूगु लिपांगु च्यागुलिं कासा नं त्याकूगु खः ।

एसीसी प्रिमियर कप विजेतां एसिया कपय् भारत व पाकिस्तान थेंज्याःगु बल्लाःगु क्रिकेट टिमलिसे म्हितेखनीगु जूगुलिं नेपाःया निंतिं थ्व धेंधेबल्लाः तसकं महत्वपूर्ण जुइ । एसिया कप वइगु सेप्टेम्बरय् जुइ । अथेहे थ्व धेंधेंबल्लाःया शीर्ष स्वंगू टिम एसिया इमिर्जिङ कपय् छनोट जुइ । नेपाःया टिमय् कप्तान रोहित पौडेलसहित १४ म्ह कासामि दु । अथेहे स्वम्ह वैकल्पिक कासामि दु ।

सम्बन्धित बुखँ

LEAVE YOUR COMMENTS