मेक्सिकोय् वापमन्थीया उदय

रुसय् जुयाच्वंगु विश्वकपय् दकलय् न्हापांगु सनसनपूर्ण लिच्वः वःगु खः– मेक्सिको पाखे जर्मनीया पराजय । जर्मनी विश्वकपया समूह चरणं हे पिने लाःवंगु छगू कारणं मेक्सिको पाखें जूगु पराजय नं जुल । थ्व लिपा ब्राजिलविरुद्ध नं मेक्सिको जबर्जस्त कासा म्हितल । विश्वकपया नकआउट चरणय् ब्राजिलयात बुकेमफुसां मेक्सिकों विश्वया नुगः त्याकावन । उकिं फुटबलप्रेमीतय् दथुइ मेक्सिकोया चर्चा जुयाच्वंगु दु ।

विश्वकपया कारणं मेक्सिकोया चर्चा गुलि जुयाच्वंगु दु, उथें हे मेगु छता कारणं नं मेक्सिको थौंकन्हय् चर्चाय् दु । थ्व कारण खः मेक्सिकोय् वःगु राजनीतिक हिउपाः । विश्वकपय् रसियाय् वयाः मेक्सिकों विश्वया नुगः सालाच्वंगु इलय् देय् दुने धाःसा बामपन्थी नेता आन्द्रेस म्यानुएल लोपेज ओब्राडोरं मेक्सिकन मतदातातय् नुगः त्याकाः सत्ताय् कब्जा यात । थन जूगु राष्ट्रपति चुनावय् ओब्राडोरं स्पष्ट बहुमत हासिल यानाः मेक्सिको न्हापांखुसी बामपन्थी सरकारया उदय यात ।

ओब्राडोरया सत्तारोहण मेक्सिकोय् जक मखु विश्वकय् चर्चा जुयाच्वंगु छगू कारण खः– मेक्सिकोय् थ्वयां न्ह्यः गुबलें नं वामपन्थी सत्ताय् थ्यनेफुगु मदुनि । वंगु ७० दँ न्ह्यवंनिसें थन निगू हे पार्टी रुढीवादी नेशनल एक्सन पार्टी व इन्ष्टिच्यूसनल रेभुलेशन पार्टीया दबदबा जुयाच्वंगु खः । तर थ्व पालय् ओब्राडोरं बहुमत जक हःगु मखु थः विपक्षीया स्वयां निदुगलं मल्याक अप्वः मत हयाः चातुवानाबिल । निक्वः तक राष्ट्रपति चुनावय् पराजय फयेधुंकूम्ह आब्राडोरं थ्व पालय् ५३.८ प्रतिशत मत हयाः चुनाव त्याकल । वया प्रतिद्वन्द्वी मुक्कं २२.८ प्रतिशत ।

ओब्राडोरया थ्व विजय मेक्सिकोया जनतां चाहना याःगु परिवर्तनया कारणं खः । अनया जनता पुलांगु सत्ता खनाः दिक्क जुयाच्वंगु खः । थज्याःगु इलय् ओब्राडोरं जनतायात थःगु नीति सत्ताय् वयाच्वंपिं पार्टीतय् स्वयां अलग जुइ धयागु विश्वास बिल, अले जनतां नं वयागु खँय् विश्वास यात ।

तच्वया वनाच्वंगु भ्रष्टाचार, लागू वासःया गम्भीर समस्या, लागू वासः विरुद्धया ल्वापुं लखौं मनूत प्रभावित जुयाच्वंगु, लखौं मनूत सिनाच्वंगु कारणं मेक्सिन जनता स्थापित पार्टी खनाः दिक्क जुयाच्वंगु खः । भ्रष्टाचा व लागू वासःया मामिलाय् थुपिं पार्टीतय्सं छुं हे ज्या मयाः । थज्याःगु इलय् जनतायात आब्राडोरया विश्वास यायेगु बाहेक मेगु उपाय नं मन्त ।

आब्राडोरयात जनतां अथें विश्वास याःगु धाःसा मखु । सत्ताय् वयाच्वंगु पार्टीत खनाः दिक्क चायाः जक जनतां ओब्राडोरया विश्वास याःगु मखु । ६४ दँया ओब्राडोरं ताःई न्ह्यव निसें समाजसेवाय् सक्रिय जुयाः जनताया सेवा याना वयाच्वंगु खः । ओब्राडोर समाजसेवाया झ्वलय् गां लागाय् यक्व हे ज्या यात । थुकिया लिसें ओब्राडोरयात बांलाःम्ह प्रशासक व बुद्धिजीवि कथं नं म्हसिका दयाच्वंम्ह खःसा बांलाःम्ह च्वमि नं खः । वयागु झिंप्यंगू सफू ला पिहां हे वयेधुंकूगु दु ।

तर वयात दकलय् अप्वः ययेकूगु कारण धाःसा राजधानी मेक्सिको सिटीया मेयर जूगु इलय् वं याःगु बांलाःगु ज्या खः । ल्याटिन अमेरिकी देशय् मेयर पद धयागु तसकं महत्वपूर्ण जुइ । अले मेयर जूगु इलय् ओब्राडोरं शहरय् खनेदयेकः हिउपाः हयाबिल । गुकिं यानाः थ्व पालय् राष्ट्रपतिइ त्याकेत ग्वाहालि जूवन ।

ओब्राडोरया विजययात मेक्सिकोय् वामपन्थीतय् उदय वा पुनर्जन्म कथं स्वयेगु यानाहःगु दु । सेन्टर राइट पार्टीं राजनीति सुरु याःम्ह ओब्राडोर सन् २००२ लय् वाम संगठनय् दुहां वंगु खः । उबलय् निसें वं वामपन्थी विचारधारा व जनवादी नीतिया प्रचार याना वःगु खः । उकिं ओब्राडोरयात विजययात मेक्सिकोय् वामपन्थी राजनीतिया उदय कथं चर्चा यानाहःगु खः ।

मेक्सिकोय् वामपन्थीया उदय जूगु छगू कारण अमेरिकी राष्ट्रपति डोनाल्ड ट्रम्पया हेपाहा प्रवृत्ति नं जूगु खँ धायेगु याः । राजनीतिक विश्लेषकतय्सं धायेगु यानाच्वंगु दु, ‘ल्याटिन अमेरिकाय् भेनेजुएला धुंकाः मेक्सिकोय् वामपन्थी सरकार वःगु धयागु ट्रम्पया हेपाहा प्रवृत्ती अनया जनतायाके ब्वलनावःगु देशप्रेम नं खः । थ्व थ्याक्क भियतनाम युद्धया इलय् थें जुयाच्वंगु दु । उबलय् नं वामपन्थी व राष्ट्र प्रेमया भावना छक्वः घुले जुयाः वःगु खः ।’

जनताय् खनेदुगु देशप्रेमया कारणं ओब्राडोरं चुनाव ला त्याकल, तर आः वं थःगु बचं पूवंके फइ ला धयागु तःधंगु न्ह्यसः दनाच्वंगु दु । विशेषत अमेरिका लिसेया सम्बन्धय् ओब्राडोरं गुलि अडान कायेफइ धयागु खँ वयाच्वंगु दु ।

मेक्सिको ल्याटिन अमेरिकाया निगूगु तःधंगु अर्थ व्यवस्था खः । थ्व देय् ताःई न्ह्यव निसें मध्यमार्गी सोच पाखें न्ह्याः वनाच्वंगु खः । तर आः ओब्राडोरं राष्ट्रियताया कडा नीति ज्वंगु दु । थ्व नीति ज्वनाः वं रुसी राष्ट्रपति भ्लादिमिर पुटिनं थें अमेरिका लिसे टक्कर कायेफइ ला धयागु न्ह्यसः दनाच्वंगु दु ।

आः सकसिया मिखा ओब्राडोरं गुकथं ज्या याइ धयागु पाखे वनाच्वंगु दु । चुनावया इलय् भ्रष्टाचारया अन्त्य यायेगु, लागू वासःल्या समस्या ज्यंकेगु व देय्यात च्वन्ह्याकेगु बचं बिउगु खः । थ्व बचं पूवंकेगु निंतिं ज्या यायेगु ला द हे दनि । थुकिया लिसें वामपन्थी जूगु कारणं अमेरिकाया दबाब नं तच्वइगु जुइ । थुकियात ओब्राडोरं गुकथं सामना यायेगु ओब्राडोरया आःया परीक्षा जुइ ।