आदिवासी चलचित्र महोत्सवय् तापलय्यात सिरपाः

येँ – आदिवासी जनजाति चलचित्र महासंघया ग्वसालय् जूगु निक्वःगु आदिवासी चलचित्र महोत्सवय् नेपालभाषाया संकिपा ‘तापलय्’ नं पब्लिक च्वाइस अवार्ड त्याकेत ताःलाःगु दु । सिरपाः वापत संकिपां नीन्याद्वः तका दांया त्याकूगु दुसा निर्देशक बालमुकुन्द प्रजापतिं उगु सिरपाःनापं हनापौ लःल्हाना कयादीगु खः ।

महोत्सवय् नेपालभाषाया नापं तामांग, किरात राई, गुरुंग, मगः, शेर्पा, माझी, थारु, राजवंशी, सुनुवार यानाः थीथी झिंप्यंगू संकिपा दथुइ जूगु धेंधेंबल्लाखय् नेपालभाषा ‘तापलय्’ संकिपां उगु सिरपाः त्याकेत ताःलाःगु खः । अथे हे महोत्सवय् संकिपा स्वःवःपिं स्वकुमिपिंसं बिउगु मतया लिधंसाय् पब्लिक च्वाइस सिरपाःया निंतिं तापलय् नापं मगः भाय्या ‘रैंया’, सुनुवार भाय्या ‘गो सु नङा’ दथुइ धेंधेंबल्लाः जूगु खः ।

महोत्सवय् आदिवासी संकिपाकःमि अरुणकुमार प्रधानं नीस्वनादीगु झिंन्याद्वः तनका दांया हःपाः सिरपाः किरात राईया ‘ढ्वाङकुम’ यात लःल्हाःगु खः । मूपाहांकथं झायादीम्ह संचार व सूचना प्रविधिमन्त्री गोकुलप्रसाद बाँस्कोटां वंगु आइतवाः जूगु महोत्सव समापन ज्याझ्वलय् सिरपाःलिसें महोत्सव ताःलाकेत ग्वाहालि यानादीपिंत सुभाय् पौ नं लःल्हानादीगु खः । अथे हे महोत्सवय् ब्वति काःगु दक्वं संकिपायात म्हति न्याद्वः तका क्यपूकथं लःल्हाःगु खः ।