जसपां विरोध प्रदर्शन याइगु

येँ (नेपालभाषा टाइम्स) – जनता समाजवादी पार्टी (जसपां) नागरिकता ऐन, २०६३ यात संशोधन यायेत दयेकूगु विधेयकया विरोध देय्या थीथी शहरय् विरोध प्रदर्शन याइगु जूगु दु। राज्य व्यवस्था तथा सुशासन समितिं पारित जुयाः प्रतिनिधिसभाय् थ्यंगु नागरिकता विधेयकया गुलिखे प्रावधान विभेदकारी जूगु धासें उगु विरोध प्रदर्शन यायेत्यंगु खः ।

म्हिगः जसपाया अध्यक्ष महन्थ ठाकुर व उपेन्द्र यादवं छगू विज्ञप्ति जारी यासें असार १६ गते जिल्ला सदरमुकाम व मू शहरय् विरोध प्रदर्शन व सभा यायेगु खँ धाःगु दु । नेपाःमि नागरिकलिसे वैवाहिक सम्बन्ध कायम याःपिं विदेशी मिसापिंसं अंगीकृत नागरिकता कायेत म्होतिं नं न्हय् दँ तक नेपालय् च्वनेमाःगु प्रावधानयात कयाः जसपां विरोध याना वयाच्वंगु खः ।

थ्वहे झ्वलय् नेपाली कांग्रेसया सभापति शेरबहादुर देउवां नागरिकता बीगु झ्वलय् मिसा व मिजंया दथुइ विभेदया ध्वः की मजिउगु खँ सामाजिक सञ्जालय् धयादीगु दु। सामाजिक सञ्जालय् वय्कलं च्वयादीगु दु, ‘नेपाःमि मिजं लिसे ब्याहा याइपिं विदेशी मिसां नागरिकता काये दइगु तर नेपाःमि मिसा ब्याहा याइपिं विदेशी मिजंनं नागरिकता काये मदइगु कथं विभेदया ध्वः की मजिउ, मिसायात निगूगु दर्जाया नागरिक दयेकेगु कथं हःगु प्रावधान संशोधन यानाः लिंगया आधारय् विभेद मजुइगु, अले समानताया अवधारण–मर्म कथं नागरिकताया विधेयक न्ह्यःने यंकेमाःगु माग जिं यानाच्वना ।’

सम्बन्धित बुखँ

LEAVE YOUR COMMENTS