ससफो छाय् सरकारय् मवन ?

येँ – संघीय समाजवादी फोरमयात सरकारय् दुथ्याकेगु निंतिं म्हिगः प्रधानमन्त्री केपी ओली, माओवादी अध्यक्ष पुष्पकमल दाहाल व ससफोया नेतातय् दथुइ जूगु खँल्हाबल्हा ताःमलाःगुलिं म्हिगः संसफो सरकारय् दुहां मवन ।

प्रम ओली व दाहालं म्हिगः हे सरकारय् वयेत ससफोयात इनाप याःगु खःसां ससफों संविधान संशोधन बारे राजनीतिक सहमति मजुइकं सरकारय् वये मखु धकाः लिसः बिउगु खँ सीदुगु दु । ससफों आःयात निगू पार्टीया सरकार निं गठन यायेगु व लिपा थःपिनि माग संवोधन जुल धाःसा सरकारय् वयेगु जुइ धाःगु दु ।
ससफोया नेतातय्सं न्हापां ‘जेन्टलमेन्ट एग्रीमेन्ट’ यायेमाः धासें आः तत्काल सरकारय् मवयेगु खँ धाःगु खः ।

सूत्रया कथं एमालेया कार्यदल व ससफोया कार्यदल दथुइ सहलह जुयाच्वंगु दुसा उमिसं संविधान संशोधनया खँय् लगभग सहमति पिकायेधुंकूगु खँ सूत्रं धाःगु दु । एमालें म्हिगः हे अस्पष्ट भासं संविधान संशोधन यायेगु खँय् थःपिं सहमत दु धकाः बचं बीधुंकूगु दु । उकिया ठोस खाका धाःसा पिहां मवःनि । एमाले कार्यदलया नेतृत्व पुलांम्ह सभामुख सुवास नेम्वाङं यानाच्वंगु दुसा ससफो कार्यदलया नेतृत्व सहअध्यक्ष राजेन्द्रं श्रेष्ठं यानाच्वंगु दु ।

कार्यदल दथुइ सहमति जुइधुंकूसां नं नेतृत्वं उकियात अनुमोदन मयाःगुलिं म्हिगः ससफो सरकारय् मवंगु खँ नं सूत्रं धाःगु दु । सहमतियात नेतृत्वं अनुमोदन यायेवं ससफो नं सरकारय् वनीगु खँ धाःगु दु ।

प्रधानमन्त्री ओलीं सरकारयात दुई तिहाई बहुमत हयेगु निंतिं नं ससफोयात सरकारय् दुथ्याकेगु कुतः यानाच्वंगु खः । ससफोयात सरकारय् दुथ्याके धुनेवं थःत लानाच्वंगु मधेश विरोधी छबी नं चिला वनीगु विश्वास प्रधानमन्त्री ओलीं कयादीगु दु । ससफोयात छम्ह मन्त्री व छम्ह राज्यमन्त्री बीगु खँ दु ।