किपुली नं नेपालभाषा तालिम

किपू- किपू नगरपालिकां थः मातहत लाःगु फुक्कं स्कुलय् थ्वहे शैक्षिक सत्रंनिसें शुरु यायेत्यंगु नेपालभाषा विषय ब्वंकीपिं शिक्षकतय्त तालिम बिउगु दु । म्हिगः– निसें थ्व तालिम शुरु याःगु खः ।

म्हिगः थनया मंगल माविइ जूगु छगू ज्याझ्वलय् किपू नगरपालिकाया प्रमुख रमेश महर्जनं उगु तालिमया उलेज्या यानादीगु दु । उलेज्या समारोहय् प्रमुख महर्जनलिसें उपप्रमुख सरस्वती खड्का, शिक्षा विभाग प्रमुख टंकलाल गैरे आदिपिंसं नुगःखँ प्वंकादीगु खः ।

किपू नगरपालिकां थःगु नपा दुने लाःगु सरकारी व निजी यानाः फुक्कं स्कुलय् कक्षा १ निसें ३ तक स्थानीय विषयया रुपय् नेपालभाषा ब्वंकेगु निर्णय याःगु खः ।

म्हिगःनिसें शुरु जूगु तालिमय् किपू नगरपालिका दुने लाःगु २८ गू स्कुलया २८ म्ह हे शिक्षकतय्सं ब्वति कयाच्वंगु दु । उकी निम्ह गैर नेवाः शिक्षकपिं नं दुथ्याः । तालिम न्यान्हु तक न्ह्याइगु खँ तालिम संयोजक जुजुभाई महर्जनं कनादिल । महर्जनं कनादीकथं थ्व तालिम किपू दुनेया ४० गू स्कुलया शिक्षकतय्त बीगु ताः तयातःगु दु ।

थ्व तालिमय् नेपालभाषा, शिक्षण विधि, किपूया शैक्षिक अवस्था, नेवाः कासा, संस्कृति, सम्पदा, पर्यटन, लसक व स्वास्थ्य आदि विषयया तालिम बीगु खँ नं महर्जनं कनादिल । किपुली नेपालभाषा विषयया पाठ्यक्रम व सफू नं तयार यानाच्वंगु खँ धाःगु दु ।

येँय् नं तालिम
येँ – येँ महानगरपालिकाय् नं नेपालभाषा ब्वंकेगु लागिं निजी स्कुलया शिक्षकतय्त तालिम बीगु शुरु जूगु दु । येँया कोट–श्वर लागाय् च्वंगु निजी स्कुलया शिक्षकतय्त थ्व तालिम शुरु याःगु खः । थुकी उगु भेगया २६ गू स्कुलया शिक्षकतय्सं ब्वति कयाच्वंगु दु ।

येँ महानगरपालिका शिक्षा विभागं बिउगु थ्व तालिमय् नेवाः स्यनामि दबूपाखें ग्वाहालि यानाच्वंगु खः । थनया जगत सुन्दर ब्वनेकुथी न्ह्यानाच्वंगु थ्व तालिम न्हय्न्हु तक सञ्चालन जुइ ।

तालिमया संयोजक वरुणप्रसाद वैद्यं कनादी कथं थ्व तालिम सिधयेवं हे उगु हे भेगया हानं मेगु निजी क्षेत्रया स्कुलया शिक्षकतय्त नं तालिम बीगु तयारी जुयाच्वंगु दु ।

सम्बन्धित बुखँ

LEAVE YOUR COMMENTS