चीनया रेल सर्वेक्षण

येँ (नेपालभाषा टाइम्स) – चीनं थःगु हिमाली लागा सिगात्से तक थ्यनेधुंकूगु रेलयात आः नेपाःलिसे सीमा स्वाःगु केरुङ तक तयेगु लागिं सर्वेक्षण ज्या क्वचायेकूगु दु । कोरोना संक्रमणया इलय् विश्व हे ठप्प जुयाच्वंगु खःसां चीनं केरुङ तक रेल हयेगु सर्वेक्षणया ज्या धाःसा जारी हे यानातःगु खः । सिगात्सेनिसें केरुङ तकया लँपु ५०० किलोमिटर दु ।

थ्व सर्वेक्षण सिधयेधुंकाः आः केरुङंनिसें नेपाःया राजधानी येँ तकया सर्वेक्षण याये ल्यं दनि । थ्व केरुङ- काठमाडौं रेलमार्गया सर्वेक्षण नं चीनं हे याइगु खँ धाःगु दु । चीनं निदँ न्ह्यः केरुङ-काठमाडौं रेलमार्ग सम्भव दु लाकि मखु धकाः सम्भाव्यता अध्ययन याःगु खः । उकी सकारात्मक लिच्वः पिहां वयेवं चीनं सिगात्सेनिसें केरुङ तकया सर्वेक्षण न्ह्याकूगु खः । नेपालय् रेल हयेगु खँ चिनियाँ राष्ट्रपति सी जिनफिङ नेपाः वःबलय् निश्चित याना थकूगु खः ।