‘आः जग्गा लाका काये दइ मखु’

सतक विस्तार विरुद्ध सर्वोच्चया पूर्णपाठ

येँ – सतक विस्तार विरुद्ध सर्वोच्च अदालतं याःगु फैसलाया पूर्ण पाठ जारी जुइवं आः सतक विस्तार यायेत लँपु चाल धकाः पिहां वःगु गुलिखे चर्चा सही मजूगु खँ थ्व सम्बन्धी अभियन्तातय्सं धाःगु दु । वरिष्ठ अधिवक्ता लिसें लार्हुनिपया महासचिव शंकर लिम्बुं ‘नेपालभाषा टाइम्स’ लिसें खँ ल्हासें आः सरकारं मुआब्जा बियाः न्ह्यागु नं जग्गा काये फइ धकाः छुं मिडियातय्सं च्वयाहःगु समाचार सही मजूगु खँ कनादिल ।

वय्कलं धयादी, ‘स्थानीय जनताया जग्गा कायेगु खःसा उकिया निंतिं ‘कन्डिसन’ दु । गबलय् न्ह्याः अबलय् जग्गा आः काये फइ मखु ।’
सर्वोच्चया पूर्ण पाठ कथं जग्गा कायेमाःगु अवस्था वल धाःसा उकिया निंतिं दकलय् न्हापां स्थानीय जनतालिसे वार्ता यायेमाःगु आवश्यकता दु ।

सतक विस्तारया निंतिं छुं हे विकल्प मदुसा जक जग्गा प्राप्ति ऐन कथं मुआब्जा बीमाः, यदि स्थानीय जनतायात चित्त बुझे मजूसा जबरजस्ती काये मदइगु स्पष्ट आदेश सर्वोच्चं बिउगु खँ वय्कलं कनादिल ।जग्गा मकासें मगाःगु अवस्था वःसा जक जग्गा काये दइ धासें उकिं यानाः सुयां छेँबुँ हे उठिवास जुइगु अवस्था वल धाःसा आः छु अवस्थाय् च्वनाच्वंगु खः वयात वहे अवस्थाय् तयेगु जक मखु वयागु रोजगारीया तक नं ग्यारेन्टी याये माःगु आदेश थुकी दुगु खँ नं वय्कलं कनादिल ।

आः न्यायोचित क्षतिपूर्ति मबिसें जग्गा काये मफइगु खँ कँसें वय्कलं आदिवासी लागाया सम्पदा, संस्कृति व ऐतिहासिक धरोहरयात आः थी हे मदइगु खँ नं वय्कलं कनादिल ।सर्वोच्चं जारी याःगु थ्व पूर्णपाठ भारत व अमेरिकाया आदिवासीतय् मामिलाय् यानातःगु थीथी फैसलात स्वयां नं अझ प्रगतिशील जूगु दावी नं वय्कलं यानादिल ।

खतुं आदिवासी जनजातिं ल्ह्वना वयाच्वनागु मुद्दायात थ्व पूर्ण पाठं पूवंक सम्बोधन मयाःसां थ्व छगू न्हूगु पलाः धाःसा जूगु खँ वय्कलं कनादिल । आदिवासीं थःगु थाय्या विकास थम्हं हे यायेगु अधिकार फ्वंगु खःसां थ्व पूर्णपाठय् उगु खँ दुमथ्याःगु खँ वय्कलं कनादिल ।

आदिवासी लागाय् छुं नं विकास निर्माणया ज्या न्ह्याके न्ह्यः स्थानीय आदिवासीयाके राज्यं अग्रिम मञ्जुरी कायेमाःगु अन्तर्राष्ट्रिय प्रावधान दु ।सर्वोच्चया थ्व पूर्णपाठ वयेधुंकाः आः स्वनिगलय् डोजर आतंक बन्द याकेत सक्रिय जुइगु ग्वसाः सडक विस्तार पीडिततय्सं दयेकाच्वंगु दु ।