सत्ता समीकरणया खेल तीव्र

येँ – सर्वोच्च अदालतं वंगु ११ गते संसद पुनस्र्थापना यायेवं सत्ता समीकरणया निंतिं सहलह यायेगु ज्या तीव्र जूगु दु । थ्व झ्वलय् नेपाल कम्युनिष्ट पार्टी (नेकपा) प्रचण्ड–नेपाल पक्षं म्हिगः जनता समाजवादी पार्टी (जसपा) या नेतात नापलासें सहलह ब्याकूगु खः ।

म्हिगः नेकपाया ज्याकू पेरिस डाँडाय् नेकपाया अध्यक्षद्वय पुष्पकमल दाहाल, माधवकुमार नेपाल व जसपाया अध्यक्ष महन्थ ठाकुर, वरिष्ठ नेता राजेन्द्र महतो व कार्यकारिणी समितिया दुजः राजेन्द्र श्रेष्ठपिनि सहलह जूगु खः ।

पार्टीगत रुपं नापलाये न्ह्यः नेकपा अध्यक्ष पुष्पकमल दाहाल व जसपाया नेता राजेन्द्र श्रेष्ठया दथुइ म्हीग याकः याकः वार्ता जूगु खःसा वयां लिपा पार्टीगत रुपं वार्ता जूगु खँ श्रेष्ठं ‘नेपालभाषा टाइम्स’यात कनादिल ।

म्हिगःया वार्ताय् थःपिंसं न्हापा नेकपाया हैसियत छु जुइ धकाः न्यनागु खःसा उकिया लिसलय् दाहालं नेकपा राजनीतिक रुपं विभाजन जुइधुंकूगु व आः कानुनी रुपं जक विभाजन जुइ ल्यं दनि धासें आः कानुनी रुपं नं निर्वाचन आयोगं थःपिंत हे आधिकारिक रुपं मान्यता बीगु दावी यानादीगु खः ।

२०४७ सालया आन्दोलन लिपा ५१ प्रतिशत दुगु राजनीतिक पार्टीयात हे निर्वाचन आयोगं आधिकारिकता बियाच्वंगु खःसा आः संसद पुनस्र्थापना जुइधुंकाः आयोगं प्रचण्ड–नेपाल पक्षयात हे आधिकारिकता बीगु सम्भावना दु धासें वय्कलं आः नं नेकपाया ७२ प्रतिशत सांसद दाहाल–नेपाल पक्षय् खनेदु, अझ गुलिखे सांसदपिं नेकपाय् लिहां वयेगु क्रम नं शुरु जुइधुंकूगु जानकारी अध्यक्ष दाहालं थःपिंत खँ कनादिल । दाहालया कथं ओली पक्षया झिंस्वम्ह सांसद दाहाल पक्षय् लिहां वयेधुंकूगु दु ।

म्हिगः वार्ताया झ्वलय् जसपां निगू पार्टीया दथुइ जक समीकरण मयासे कांग्रेसनाप नं सहकार्य यायेमाःगु प्रस्ताव याःगु खः । स्वंगुलिं पार्टीया प्रस्ताव कथं दाहालयात प्रधानमन्त्री दयेकेगु कथं सहलह जूगु जानकारी नं भाजु श्रेष्ठं बियादिल ।

जसपां आःया समीकरण प्राकृतिक जुइमाः धासें संघीयता, समानुपातिक, आदिवासी जनजातिया सवाल, धर्मनिरपेक्षताया सवालय् स्पष्ट जुइमाःगु, सत्ताया निंतिं जक गठबन्धन जुइ मजिउगु खँ नं न्ह्यथंगु खः । उगु इलय् जसपां आपालं जनजाति नेतातय्त ज्वनातःगु नापं थः सांसद रेशम चौधरीयात कुनातःगुलिं वय्कःयात त्वःतेमाःगु खँ समेत ल्ह्वंगु खः ।

सत्ता समीकरणया लागिं नेपाल–दाहाल पुचलं नेपाली कांग्रेसलिसे नं खँ न्ह्याकूगु दु । तर कांग्रेसया गुलिखे नेतातय्सं धाःसा आः गठन जुइगु सरकारयात थःपिंसं समर्थन यायेगु बाहेक कांग्रेस थः हे सरकारय् वनेगु उचित मजुइगु खँ धयाहःगु खः । दाहाल–नेपाल पुचःलिसे खँ ल्हासें कांग्रेस नेतातय्सं नेकपाया वर्तमान अवस्था छु दु, हानं छगू जुइगु सम्भावना दु लाकि मदु धइगु खँय् अप्वः ध्यान बियाः न्ह्यसः तःगु खँ सीदुगु दु ।

पार्टी सरकारय् वने जिउ लाकि मजिउ धयागु खँय् पार्टी दुने हे विवाद दनिगु जुयाः कांग्रेसं स्पष्ट लिसः मबिउगु खँ नं धाःगु दु ।

सम्बन्धित बुखँ

LEAVE YOUR COMMENTS