न्हापा सिबें म्हो जक मतदान

येँ (नेपालभाषा टाइम्स)- वंगु छुं न्हि न्ह्यवंनिसें चर्चाया विषय जुयाच्वंगु तनहुुँ–१, चितवन–२ व बारा–२ लय् आइतवाः मतदान क्वचाल । थ्व स्वंगुलिं क्षेत्रय् देय्या राजनीतिइ बिस्कं कथं चर्चाय् वयाच्वंपिं नेतात उम्मेदवार कथं दनाच्वंगु जूगुलिं थुकिया बारे आपालं चर्चा जुयाच्वंगु खः । आइतवाः क्वचाःगु मतदानय् थ्व स्वयां न्हापा जूगु मतदान स्वयां म्हो जक मत कुहां वंगु खँ निर्वाचन आयोगं धाःगु दु ।

न्हापा रवि लामिछानें त्याकातःगु चितवन–२ लय् वंगु मंसिर ४ गते जूगु निर्वाचनय् ६७ प्रतिशत कुहां वंगु खःसा आइतवाःया मतदानय् ६२ प्रतिशत जक मत कुहां वन । अथे हे तनहुँ–१ य् न्हापा ५३ प्रतिशत मत कुहां वंगु खःसा म्हिगः ५२ प्रतिशत कुहां वन । बारा–२ लय् न्हापा ६४ प्रतिशत मत कुहां वंगु खःसा म्हिगः ६१ प्रतिशत जक कुहां वंगु दु ।

थ्व स्वयां न्हापाया चुनावय् थ्व स्वंगू क्षेत्रं निर्वाचत जूपिं उम्मेदवारत मध्ये चितवनया रवि लामिछानें ४९ हजार ३०० मत हःगु खःसा तनहुँलय् रामचन्द्र पौडेलं २५ हजार ३६१ मत हःगु खः । अथे हे बाराय् रामसहाय प्रसाद यादवं १३ हजार ८२२ मत हःगु खः । आः निर्वाचित जुइपिं उम्मेदवारतय्सं थुलि मत काये फइ लाकि मफइ धकाः सकस्यां ध्यान वनाच्वंगु दु ।

म्हिगः छुं छुं थासय् ल्वापु जुयाः मतदान स्थगित समेत यायेमाःगु खःसां लिपा हानं मतगणना नं शुरु याना छ्वःगु खः । खास यानाः चितवनया चुनावय् छुं छुं थासय् तनाव ब्वलंगु खः ।

थ्व चुनावय् चितवनं रवि लामिछाने हानं त्याइगु अनुमान जुयाच्वंगु दु । अथे हे तनहुँपाखें रास्वपाया हे डा. स्वर्णिम वाग्ले व बारापाखें जसपाया उपेन्द्र यादव त्याइगु अनुमान जुयाच्वंगु दु । रास्वपां छम्हेसित लिकाःगु बदला स्वम्ह त्याकाः क्यने धकाः प्रचार यानातःगु दु ।