थुगुसी २० लाखं स्वनिगः त्वःतीगु

येँ – थुगुसी मोहनि न्यायेकेत येँ देय् त्वःताः छेँय् वनीपिं मनूतय् ल्याः अप्वःगु खँ सीदुगु दु । थौंकन्हय् न्हिंन्हिं हे नागढुङ्गा, साँगाभञ्जाङ, मुड्खु व फर्पिङ जुयाः स्वनिगः त्वःतीपिं मनूतय् ल्याः न्हिं ५० द्वः स्वयां अप्वः थ्यनाच्वंगु दु । थ्व ल्याखं थुगुसी मोहनिबलय् करिब २० लाख मनूतय्सं येँ देय् त्वःतीगु अनुमान जुयाच्वंगु खँ महानगरीय ट्राफिक कार्यालयया प्रवक्ता राजेन्द्रप्रसाद भट्टं कनादिल ।

थगुने व नगुने कोरोनाया कारणं यानाः मोहनि हनेत पिहां वनीपिं मनूतय् ल्याः म्हो जूगु खः । स्वदँ न्ह्यः मोहनिया इलय् येँ देय् त्वःतीपिं मनूतय् ल्याः २० लाखया जःखः दुगु खः ।

मोहनियात छेँय् वनीपिं यात्रुतय् सहजीकरण यायेत ट्राफिक प्रहरीं ग्वंगःबुँ, चाबही, कोटेश्वर, कलङ्की लगायत स्वनिगःया १४ गू थासय् यात्रु सहायता कक्ष चायेकूगु दु ।

सवारी चाप व भिडभाडया कारणं जुइ फइगु खुँज्या व पाकेटमार नियन्त्रण, क्षमता सिबें अप्वः मनू तया यंकीपिं गाडीतय्त कारवाही यायेत सादा पोशाकय् नं प्रहरी खटे यायेगु खँ प्रहरीं धाःगु दु ।

महानगरीय ट्राफिक प्रहरी कार्यालयं मोहनि न्यायेकेत छेँय् वनीपिं मनूत लिहां वइबलय् यात्रुया चाप अप्वइगु जुयाः सवारी दुर्घटना जुइ फुगु जुयाः चालकं तसकं ब्वाकाः चले यात धाःसा वा अय्लाः त्वनाः गाडी चले यात धाःसां नं प्रहरीयात खबर यायेत इनाप याःगु दु । यातयात व्यवसायीतय्सं नं मोहनियात गाक्क गाडी दइगु खँ धासें सवारी साधनया अभाव मजुइगु जूगुलिं यात्रुतय्त ढुक्क जुयाः यात्रा यायेत नं इनाप याःगु दु ।

थौंकन्हय् स्वनिगलय् दुहां वइगु सवारी साधन सिबें पिहां वनीगु सवारी साधन व यात्रुया ल्याः यक्व दयाच्वंगु दु । प्रहरीं छतय् मच्वनेत, गाडीइ झुण्डे मजुइत नं यात्रुतय्त निरन्तर इनाप यानाच्वंगु दु । (रासस)