नीति तथा कार्यक्रम – गरिबीया दसिपौ बियाः सुविधा

येँ – सरकारं गरिब लिसें विपन्न छेँजःयात परिचयपत्र इनाः उकिया आधारय् सुविधा बीगु जूगु दु । राष्ट्रपति विद्यादेवी भण्डारीं म्हिगः सदनय् पेश याःगु आर्थिक दँ ०७९÷८० या नीति तथा कार्यक्रमय् पहिचान जूपिं गरिब व विपन्न छेँजःपिंत परिचयपत्र इनाः परिचयपत्रया आधारय् सुविधा बीगु खँ न्ह्यथनातःगु दु ।

उकथं हे हिमाली व उच्च पहाडी जिल्लाय् न्ह्यानाच्वंगु जीविकोपार्जन ज्याझ्वःयात मानव विकास सूचकांकय् लिउने लानाच्वंगु जिल्लाय् विस्तार यायेगु जानकारी नं वय्कलं बियादिल । सरकारं गरिब छेँ म्हसीकेगु ज्या वंगु झिदँ न्ह्यवंनिसें यानाच्वंगु खःसा अज्याःगु छेँजःतय्सं परिचयपत्र काये– धुंकूसां नं गुगुं नं कथंया सुविधा धाःसा काये फयाच्वंगु मदु ।

अथे हे राष्ट्रपति भण्डारीं न्ह्यब्वःगु नीति तथा कार्यक्रमय् सरकारं नेपाःया उत्पादनया बजाः विस्तार व उपभोग वृद्धिया नितिं ‘नेपाली उत्पादन तथा उपभोग अभिवृद्धि अभियान दशक’ घोषणा याःगु दु ।

नेपाःया अर्थतन्त्रयात समुन्नत दयेकेत ‘नेपाःया उद्योग, नेपालय् रोजगार, थःगु उत्पादन, थःहे रोजगार’ धइगु नारायात अभियान दयेकाः न्ह्याकेगु खँ नं उल्लेख दु ।

वय्कःया कथं अभियानयात सफलतापूर्वक न्ह्याकेत प्रधानमन्त्रीं नेपाःया उत्पादन व उपभोग अभिवृद्धि ज्याझ्वः सञ्चालन याइसा अज्याःगु ज्याझ्वः अन्तर्गत कर व भन्सार महसुल व निर्यात अनुदानपाखें प्रवद्र्धन याइ । उकथं हे सरकारं ऊर्जा दक्षता व नवीकरणीय ऊर्जाया उपयोगपाखे हरित अर्थतन्त्रया विकास यायेगु व औद्योगिक प्रवद्र्धनया नीति काइगु खँ नं उकी दुथ्यानाच्वंगु दु ।

अथे हे सरकारं कृषियात आर्थिक वृद्धिया बल्लाःगु आधारया रुपय् विकास यायेगु नीति काःगु दु । खाद्य वस्तुया उत्पादन अप्वयेकेगु व लागत म्हो यायेगु कार्यक्रम हयेगु खँ नं राष्ट्रपति भण्डारीं धयादीगु दु ।

सरकारं बिउबिजनय् आत्मनिर्भर जुइगु व जलवायु परिवर्तनया लिच्वःयात फये फइगु बालीया अनुसन्धानय् लगानी यायेगु, अग्र्यानिक बुँज्याय् लगानी प्रवद्र्धन यायेगु, बाझः वनाच्वंगु जग्गा सदुपयोग यानाः मू श्रृंखलाय् आधारित मंकाः व सहकारी बुँज्या प्रणालीयात प्रोत्साहित यायेगु नीति सरकारं काःगु दु । उकथं हे प्रधानमन्त्री रोजगार ज्याझ्वःया आवधिक समीक्षा यानाः प्राविधिक व आर्थिक दृष्टिकोणं सम्भाव्य बाली व वस्तुयात प्रदेशय् हस्तान्तरण याइगु खँ नं धाःगु दु ।

सम्बन्धित बुखँ

LEAVE YOUR COMMENTS