एमसीसी – चीन व अमेरिकां छु धाल ?

येँ – ताःहाकःगु कचवं लिपा नेपाःया संसदं एमसीसी पारित यायेवं चीनं थःगु प्रतिक्रिया बिउगु दु । चीनं थुकिया बारे प्रतिक्रिया बिसें एमसीसी सम्झौता पारित जुइधुंकाः थःपिंसं थुकिया ‘व्याख्यात्मक घोषणा’ यात ध्यान बियागु खँ धाःगु दु ।

म्हिगः चीनया राजधानी बेइजिङय् पत्रकार सम्मेलन यासें चिनियाँ परराष्ट्र प्रवक्ता वाङ वन पिनं छगू मित्रवत् जःलाःखःला व विकास साझेदारया रुपय् चीनं न्ह्याबलें थें हे नेपाःमि जनताया विकास जुइगु लँपुयात समर्थन यायेगु जुइ धयादीगु दु ।

पत्रकार सम्मेलनय् प्रवक्ता वाङं अन्तर्राष्ट्रिय विकास सहयोग थवंथवय् सम्मान व समान व्यवहारया सिद्धान्तयात पालन यायेमाःगु, सम्बन्धित देय्या सार्वभौम सत्ता व जनताया इच्छाया पूर्ण सम्मान यायेमाःगु व मेगु देय्या आन्तरिक मामिलाय् हस्तक्षेप यायेगु कथंया राजनीतिक शर्त मतयेगु खँय् चीनं बः बीगु खँ नं धयादीगु दु ।

एमसीसी पारित यायेगु सवालय् नेपालं थःपिंसं हे सिर्जना याःगु ‘व्याख्यात्मक घोषणा’ यात कयाः अमेरिकाया धाःसा छुं प्रतिक्रिया वःगु मदुनि । अथे नं म्हिगः छगू पत्रकार सम्मेलन यासें नेपाली कांग्रेसया प्रवक्ता डा. प्रकाशशरण महतं नेपाःया व्याख्यात्मक घोषणा प्रति अमेरिकाया समर्थन दुगु खँ धयादीगु दु । थुकिया व्याख्या बारे नेपाःया छु बिचाः खः अमेरिकाया नं वहे बिचाः जूगु खँ कनादीगु दु । विज्ञ सूत्रतय्सं धाःसा अमेरिकालिसे खँ ल्हानाः हे थ्व व्याख्यात्मक घोषणा तयार यःगु जूगुलिं अमेरिकां उकी सहमति क्यंगु खः । तर एमसीसीपाखें धाःसा थुकी थःपिंपाखें छुं संशोधन मजुइगु खँ धायेधुंकूगु दु ।

थ्वहे झ्वलय् माओवादी केन्द्रया अध्यक्ष पुष्पकमल दाहालं शान्ति सम्झौताया ल्यं दनिगु ज्या, लोकतन्त्र व संविधान हे खतराय् लाइगु अवस्था वःगुलिं थम्हं एमसीसी पारित यायेत सहमति बियागु खँ धयादीगु दु । म्हिगः छगू पत्रकार सम्मेलन यासें उगु खँ धयादीगु खः । वय्कलं धयादिल, ‘राष्ट्रिय सहमति जुइमा धकाः न्ह्याः वना तर मजुल, थुकिं शान्ति प्रक्रिया, संविधान व लोकतन्त्र खतराय् लाइगु खनेदत, अथे जुयाः हे थुगु निर्णय यायेमाःगु खः ।’

उकथं हे वय्कलं एमसीसीयात संसदं संकल्प प्रस्ताव पारित यायेत नेपाल कम्युनिष्ट पार्टी जुयाच्वंगु इलय् प्रस्ताव यानागु खःसां तत्कालीन प्रधानमन्त्री केपी शर्मा ओलीं उकियात अस्वीकार याःगु द्वपं नं बियादिल ।

अथे हे वय्कलं विज्ञपिं लिसे सहलह यानाः हे थःपिंसं व्याख्यात्मक घोषणा तयार यानागु खः धासें थुकी अमेरिकी दूतावासं नं सकारात्मक प्रक्रिया बिउगु खँ नं कनादिल ।
वय्कलं सार्कया पुलांम्ह महासचिव अर्जुन थापा, बेलायतय् च्वनाच्वंम्ह अन्तर्राष्ट्रिय कानुनया प्राध्यापक सूर्य सुवेदी व अन्तर्राष्ट्रिय कानुनविद् गोविन्द बन्दीपिंलिसे सहलह यानागु व वय्कःपिनिगु सल्लाह कथं हे व्याख्यात्मक टिप्पणी सहित एमसीसी पारित यानागु खँ नं धयादिल ।

सम्बन्धित बुखँ

LEAVE YOUR COMMENTS