पोखराय् नेवाः संग्रहालय

येँ – पोखराय् नेवाः संग्रहालय दयेकेगु तयारी जुयाच्वंगु दु । नेवाः खलः कास्कीं उगु संग्रहालय दयेकेत्यंगु खः ।नेवाः संस्कृति, जीवन शैली लिसें नेवाःतय् जन्मंनिसें मृत्यु तकया संस्कारय् छ्यलीगु ज्वलं बारे लिपांगु पुस्तायात ज्ञान बीत व पर्यटकयात आकर्षण यायेगु आज्जु तयाः उगु संग्रहालय दयेकेत्यंगु खः ।

नेवाः खलः कास्कीया अध्यक्ष अशोक पालिखेया कथं भिमसेन द्वादश गुथिया भवनय् थ्व संग्रहालय दयेकाच्वंगु दु । खुला दुने दयेके सिधयेकाः सर्वसाधारणयात खुल्ला यायेगु लक्ष्य तयातःगु दु । संग्रहालय नेवाः परम्परा व संस्कृति ब्वयेगु कथं पुलांगु थलबल, कलश लिसें थीथी नेवाः हलंज्वलं तयेधुनागु खँ कनादिसें अध्यक्ष पालिखें उगु संग्रहालय दुने २३६ दँया पाथि व खुगू फिट तजाःगु त्वाःदेवा नं ब्वयातःगु दु ।

उकथं हे अन २०९ दँ न्ह्यःया घः नं स्वये फइ । संग्रहालय दुने तायो मचा, बाह्र भैरव प्याखं लिसें फुक्कं नेवाः कर्मकाण्ड बारे श्रव्यदृश्य सामग्री तकं दइगु खँ धाःगु दु । नेवाः संस्कार व संस्कृतिया अध्येता व पर्यटकयात क्यनेगु ताः तयातःगु दु । दयेकेगु ज्या क्वचायेवं पर्यटकयात निश्चित शुल्क कयाः अवलोकन याकेगु ग्वसाः यानातःगु दु ।

संग्रहालय दयेकेगु निंतिं आः तक नेपाल पर्यटन बोर्ड पोखरापाखें ८५ लाख तका ग्वाहालि यायेधुंकूगु दु । संस्कृतिविद् तीर्थ श्रेष्ठया कथं कास्कीया तत्कालीन जुजु सिद्धिनारायण शाहं वि.सं १८३५ स ख्वपया नीखुखा नेवाःतय्त पोखराय् हयाः तःगु खः । उगु इलंनिसें पोखराय् नेवाः बस्ती विकास जुयावंगु विश्वाव दु ।