जम्मरकट्टेलयात थौं विश्वासया मत

येँ (नेपालभाषा टाइम्स)- बागमति प्रदेशया मुख्यमन्त्री शालिकराम जम्मरकट्टेलं थौं विश्वासया मत काइगु जूगु दु । राष्ट्रपतिया चुनाव लिपा राप्रपां सरकारयात बियातःगु समर्थन लित कायेवं मुख्यमन्त्रीं हानं विश्वासया मत कायेमाःगु खः ।

वंगु चैत ८ गते हे जम्मरकट्टेलं विश्वासया मत कायेगु तयारी याःगु खःसां नेपाली कांग्रेसया सांसदत सदनय् उपस्थित मजुइगु खँ वयेवं थौं विश्वासया मत कायेत्यंगु खः । जम्मरकट्टेलयात कांग्रेसं नं मत बीगु निर्णय यायेधुंकूगु दु ।

विश्वासया मत काइगु ई न्ह्यःने थ्यनेधुंकाः नं एमालें सरकार मत्वःतूगुलिं धाःसा थीथी आशंका ब्वलंगु दु । बागमति प्रदेशया आन्तरिक मामिला तथा कानुन मन्त्री गंगानारायण श्रेष्ठं थौं एमालें सरकार त्वःतीगु खँ कनादीगु दु । वय्कलं म्हिगः ‘नेपालभाषा टाइम्स’ लिसे खँ ल्हासें उगु खँ कनादीगु खः । वय्कलं कनादीकथं थौं विश्वासया मत बीगु इलय् हे एमालेया मन्त्रीतय्सं संसदय् सम्बोधन यासें राजीनामा घोषणा बीगु तयारी जुयाच्वंगु दु ।

उकथं हे नेपाली कांग्रेसया संसदीय दलया उपनेता रामकृष्ण चित्रकारं नं एमालें राजीनामा बीगु विश्वास प्वंकादीगु दु । वय्कलं यदि विश्वासया मत कायेधुंकाः नं राजीनामा मबिल धाःसा मुख्यमन्त्री जम्मरकट्टेलं चीके फइगु खँ धासें राजीनामा बीत एमाले बाध्य जुइगु खँ धयादीगु दु ।