दुर्लभ कारणं जापान नकआउट चरणय्

एजेन्सी- एशियाली टिम जापान विश्वकपया नकआउट चरणय् दुहां वंगु दु । जापान तसकं दुर्लभ कारणं नकआउट चरणय् थ्यनेत ताःलाःगु खः । बिहिवाः जूगु कासाय् पोल्यान्डलिसे १–० गोलं बूसां जापानं अन्तिम झिंखुगुली थाय् दयेकूगु खः । नकआउट चरणय् थ्यंगु जापान छगू जक एशियाली देय् नं जूगु दु ।

म्हिगः हे जूगु मेगु कासाय् कोलम्बियां सेनेगलयात बुकवं जापान व सेनेगलया ४–४ अंकं जूगु खः । सामान्यतः अंक बराबर जुल धाःसा गोल अन्तरया ल्याखं छनोट याइगु खः, गोल अन्तर नं बराबर जुल धाःसा गोल नःगुयात आधार काइ, उकिं नं मजिल धाःसा हेड टु हेडय् सु त्याःगु स्वइ, अले उकिं नं मजिल धाःसा कासाय् क्यंगु अनुशासनया आधारय् छनोट याइगु खः ।

म्हिगः जापान अनुशासनया आधारय् नकआउट चरणय् छनोट जूगु खः । विश्वकपया इतिहासय् न्हापांखुसी सुं नं टिम थथे अनुशासनया आधारय् छनोट जूगु खः । सेनेगल कोलम्बिया लिसे १–० गोलं व जापान नं पोल्यान्डलिसे १–० गोलं पराजित जुइवं निगुलिं टिमया ४–४ अंक जुल, अले गोल अन्तर नं शून्य शून्य जुल, अथेहे निगुलिं टिमं ४–४ गोल नःगु दुसा ३–३ गोल याःगु दु । अथेहे हेड टु हेड कासाय् नं २–२ गोलया बराबरीया कासा क्वचाःगु खः । थ्व अवस्थाय् निगुलिं टिमं नःगु म्हासुगु कार्डया आधारय् छनोट जूगु खः । गुकी म्हो जक म्हासुगु कार्ड नःगु जापान छनोट जुल । लिग चरणय् जूगु स्वंगू–स्वंगू कासाय् जापानं प्यंगू जक म्हासुगु कार्ड नःगु खःसा सेनेगलं खुगू म्हासुगु कार्ड नःगु दु ।

अनुशासनया कारणं छनोट जूगु जापानं म्हिगः अन्तिम कासाय् थःपिं छनोट जुइगु अवस्था वयेवं अन्तिम इलय् धाःसा धेंधेंबल्लाः हे मखुथें च्वंक विपक्षी पोस्टय् आक्रमण तकं मयासे त्वाकतुक्क म्हितूगु खः । कासाया ५९ औं मिनेटय् पोल्यान्डया बेड्नारेकं गोल यायेवं आक्रामक जूगु जापान मेगु कासाय् कोलम्बियां सेनेगलयात नं गोल नकूगु खबर वयेवं बुलुहुं कासा म्हितूगु खः । कोलम्बियाया मिनां ७४ मिनेटय् सेनेगलविरुद्ध गोल याःगु खबर वयेवं जापानं थःम्हं गोल नं मनयेगु, अले म्हासुगु कार्ड नं मनयेगु ल्याखं थःथवय् जक बल पास यानाः म्हितूगु खः । मेखे पोल्यान्डं नं सान्त्वनाया रुपं छगू कासा त्याकेगु कथं गोल यायेधुंकाः बल लाकः तकं मवँसे च्वंगु खः ।

समूह एच पाखें कोलम्बिया ६ अंक कयाः समूह विजेता जुयाः नकआउट चरणय् दुहां वंगु खः । कोलम्बियां आः नकआउट चरणय् इंग्ल्यान्ड लिसे म्हितीसा जापानं बेल्जियमलिसे म्हिती ।

वंगु चान्हय् जूगु कासाय् बेल्जियमं इंग्ल्यान्डयात १–० गोलं बुकूगु खः । थुगुसी दकलय् बांलाःगु कासा म्हिताच्वंगु बेल्जियम विश्वकपया दावेदार कथं न्ह्यःने वयाच्वंगु दु ।

सम्बन्धित बुखँ

LEAVE YOUR COMMENTS