विश्वकप लिपा गेलया संन्यास

वेष्टइण्डिजया ब्याट्सम्यान क्रिस गेलं विश्वकप लिपा संन्यास कायेगु घोषणा याःगु दु । विश्व क्रिकेटय् विस्फोटक ब्याट्सम्यानया म्हसिका दुुम्ह गेल थ्व हे दँय् इंग्ल्याण्ड व वेल्सय् जुइत्यंगु एक दिवसिय विश्वकप लिपा संन्यास कायेगु खँ धाःगु खः । विश्वकप थ्व हे मे ३० निसे जुलाई १५ तक जुइ ।

एकदिवसीय क्रिकेटय् क्रिस गेलं २३ गू शतक व ४९ गू अर्धशतक दयेकेधुंकूगु दु । गेलं एकदिवसीय क्रिकेटय् आतक ९७२७ रन दयेके धुंकूगु दु । थ्व लिसें गेल वेष्टइण्डिजया दकलय् अप्व रन दयेकूम्ह निम्हम्ह कासामि नं जुयाच्वंगु दु । गेलं २५४ कासा म्हिताः २७९ इनिङ्सय् थ्व रन दयेकूगु खः । दकलय् अप्वः रन दयेकूम्ह कासामिया धलखय् न्हापांगु थासय् ब्रयान लारा दु ।

लारां १०४०७ रन दयेकातःगु दु । गेल सन् १९९९ भारत विरुद्ध जूगु कासाय् डेब्यु याःगु खः । गेलं छगू हे कासाय् आःतक सर्वाधिक २१५ रन दयेकूगु रेकर्ड दु । सन् २०१५ या विश्वकपय् गेलं जिम्बाबे विरुद्ध दोहोरो शतक प्रहार याःगु खः । विश्वकपय् दोहोरो शतक प्रहार याःम्ह गेल न्हापांम्ह कासामि नं खः ।

अथेहे एकदिवसीय कासाय् दोहोरो शतक प्रहार याःम्ह गेल खुम्हम्ह कासामि खः । अलराउण्डरया रुपय् नं न्ह्यःने लाःम्ह गेलं १६५ विकेट नं कायेधुंकूगु दु ।गेलं वइगु बुधवाः निसे इंग्ल्याण्ड विरुद्ध जुइगु न्यागू एकदिवसीय शृङ्खलाय् नं म्हितेत्यंगु दु ।