आदिवासी चलचित्र महोत्सवय् स्व‌ंगू नेवाः स‍ंकिपा

येँ – आदिवासी जनजाति चलचित्र महासंघया ग्वसालय् निक्वःगु आदिवासी जनजाति चलचित्र महोत्सव–२०७५ जुइगु जूगु दु । महासंघं थन छगू पत्रकार सम्मेलन यासें बिउगु जानकारीकथं बहुभाषिक व बहुसांस्कृतिक देय् नेपाःया पहिचानयात प्रवद्र्धन यायेगु उद्देश्यं निक्वःगु आदिवासी चलचित्र महोत्सव थ्व हे वइगु असार १५ गतेनिसें जुइ ।

चलचित्रया माध्यमं नेपाःया आदिवासी जनजातिया भाय् नापं मौलिक कला, संस्कृति, धर्म व रीतिथितिया दस्तावेजीकरण व उकिया संरक्षण यायेगु उद्देश्यं महोत्सवया ग्वसाः ग्वयेत्यनागु महासंघं पत्रकार सम्मेलनय् जानकारी बिउगु दु । थनया भृकुटीमण्डपस्थित पर्यटन बोर्डया हलय् जुइगु महोत्सवय् थीथी आदिवासी जनजातिया संकिपा प्रदर्शन याइगु जूगु दु ।

पत्रकार सम्मेलनय् बिउगु जानकारीकथं महोत्सवय् नेपालभाषया निगू संकिपा ‘कमलपोखरी’ व ‘तापलय’् नापं गुरुङ भाय्या ‘मैरिमो’ व ‘पा’, माझी भाय्या ‘लदी पूजा’, शेर्पा भाय्या ‘टिन्छेन फमा’, थारु भाय्या ‘टुटल जिन्दगी’ व ‘मन्दरा’, राई भाय्या ‘ढवाङ्गकुम’, राजवंशीया ‘दुलारी’ सुनुवार भाय्या ‘गो सु नंगा’, मगः भय्या ‘रैयाँ’ व ‘तमसुक’ व तामाङ भाय्या ‘मायासे लासी’ यानाः झिंप्यंगू संकिपा क्यनीगु जूगु दु ।

महासंघया अध्यक्ष अमृतबहादुर सुनुवारं राज्यया ग्वाहालि मकासे नं आदिवासी जनजातितय्सं थःगु मांभाय्यात मतिना यानाः १५ निसें ६० लाख तका खर्च यानाः संकिपा दयेकेगु यानावयाच्वंगु धयादिल ।

‘नेपालय् संघीयतासहितया संविधान कार्यान्वयनय् वयेधुंकाः नं आदिवासी जनजातिया संकिपायात धाःसा राज्यं न्ह्याबलें भेदभावया दृष्टिं स्वयेगु यानाच्वंगु दु’, वय्कलं धयादिल, ‘दक्वं भाषाभाषीया संकिपाया विकास जूसा जक समग्र देय्या नं विकास जुइ, अले थुकिं देय्या आर्थिक ख्यः नं बल्लाइ ।’

महासंघया महासचिव पुर्खाजित राईं उत्कृष्ट संकिपायात ‘पब्लिक च्वाइस अवार्ड’ व नीन्याद्वः तका नापं ट्रफी बीगु व महोत्सवय् दुथ्याःगु संकिपायात प्रोत्साहनकथं न्याद्वः तका दां बीगु जानकारी बियादिल ।

वि.सं. २०४४ सालय् नेपालय् दकलय् न्हापांखुसी आदिवासी चलचित्र दयेकेगु शुरु जूगु खः । उगु इलय् नेपालभाषाया ‘सिलु’ नांया संकिपापाखें शुरु जूगु थ्व यात्रा थौंया इलय् तक थ्यंगु इलय् खुसलं मल्याक आदिवासी जनजातिया संकिपा निर्माण जुइधुंकूगु महासंघं जानकारी बिउगु दु ।