ख्वपया लानिपुखू पुनर्निर्माण याइगु

ख्वप (नेपालभाषा टाइम्स) – ख्वपया ऐतिहासिक लानिपुखू पुनर्निर्माण यायेगु प्रतिवेदन तयार जूगु दु । ख्वपया ऐतिहासिक पुखू पुनर्निर्माणया निंतिं ख्वप नगरपालिकां संस्कृतिविद् प्रा डा.पुरुषोत्तमलोचन श्रेष्ठया संयोजकत्वय् पुखू दयेकेत अध्ययन समिति नीस्वंगु खः ।

समितिं पुखूया ऐतिहासिक पक्ष, मौलिक स्वरुपया अध्ययन लिपा प्रतिवेदन तयार याइगु खँ धाःगु दु । समितिं तयार याःगु प्रतिवेदन वंगु बुधवाः ख्वप नगरपालिकाया प्रमुख सुनिल प्रजापतियात लःल्हाःगु खः । प्रतिवेदन लःल्हाःनाः कायेगु झ्वलय् मेयर प्रजापतिं ख्वपया सम्पदाया ऐतिहासिक दस्तावेजीकरण यायेगु कथं सम्पदा पुनर्निर्माण जुयाच्वंगु खँ धयादीगु दु । वय्कलं ख्वपया सार्वजनिक सम्पत्तियात जनताया मंकाः सम्पत्तिया रुपय् कायेगु आज्जु कथं नगरपालिका न्ह्यानाच्वंगु खँ नं धयादीगु दु ।

अथेहे उपमेयर रजनी जोशीं पुखूया पुनर्निर्माणया झ्वलय् थीथी कथंया अध्ययन अनुसन्धान जूगु व उकिं न्हूगु तथ्य व प्रमाण तकं लूगु खँ धयादीगु दु ।