राजोपाध्याय समाजया म्येँ धेंधेंबल्लाखय् सक्षम न्हाप

यल (नेपालभाषा टाइम्स)÷ राजोपाध्याय समाज दुनेया गायन प्रतिभाया ल्ययेत जूगु म्येँ धेंधेंबल्लाः कासाय् सक्षम शर्मा राजोपाध्याय विजयी जूगु दु ।

राजोपाध्याय समाजया ग्वसालाय् वंगु शनिबार यलय् जूगु धेंधेंबल्लाःया बिजं कासाय् सक्षमं अंकित अमरु श्रेष्ठया ‘लजाएर एक्लै बसेकी किन मायालु’ बोलय् म्ये“ हालाः न्हाप लाकेत ताःलाःगु खः ।

अथे हे उगु धेंधेंबल्लाः कासाय् सुभिया राजोपाध्याय लिउ व सौरभ राजोपाध्याय लियांलिउ लाःगु खः । विजयी जूपिंत निर्णायक मण्डलया दुजः कलानिधि इन्दिरा संगीत महाविद्यालयया प्रिन्सिपल, गायक धनबहादुर गोपालीं ट्रफि लःल्हानादीगु खःसा नगद सिरपाः धाःसा पौष महिनाय् जुइगु समाजया दँमुँज्याय् लःल्हायेगु समाजया अध्यक्ष संजय शर्मा राजोपाध्यायं जानकारी बियादिल ।

न्हाप, लिउ व लियां लिउजूपिंत नगद सिरपाः छसिकथं झिद्वः, न्हय्द्वः व प्यद्वः तकाया व्यवस्था यानातःगु खः ।

विजेतापिनिगु नां निर्णायक मण्डलया दुजः गोपालीं घोषणा यायेगु झ्वलय् वंगु इलय् कला क्षेत्रयात हेपाह दृष्टिं स्वइगु खःसा नं आः धाःसा थुगु क्षेत्र नं सम्मानित जुयावःगु धाःसे अभिभावकपिंसं थः सन्तानतय्त कला क्षेत्रय् न्ह्यचिलेत हःपाः बीत इनाप यानादिल । निर्णायक मण्डलय् गोपाली नापं संगीत संयोजक, क्लासिकल गितारिस्ट भुपेन्द्र वज्राचार्य व नेपाःया न्हापांम्ह हवाइन गितारिस्ट ईश्वर जोशी च्वनादीगु खः ।

ज्याझ्वलय् गायक सुरजबीर बज्राचार्य, निर्णायक मण्डलका दुजः लिसे संगीत संयोजक व गायक भुपेन्द्र बज्राचार्यया थःगु प्रस्तुती न्ह्यब्वःगु खः । लिसें मुनिन्द्र ज्वालानन्द राजोपाध्याय व विनित ज्वालानन्द राजोपाध्यायं सारंगी व बाँसुरी वादन न्ह्यब्वःगु खः ।

सम्बन्धित बुखँ

LEAVE YOUR COMMENTS