ने. सं. ११४३ तछलागा चौथी -

पुलांगु लुँ छेँय् छेँय्, बजारय् धाःसा गायब

येँ – इहिपाया सिजन न्ह्यःने वयाच्वंगु इलय् लाक्क फुक्क धइथें बैंकं आयात यानातःगु लुँया स्टक फूगु खँ पिहां वःगु दु । थ्वहे झ्वलय् बजारय् लुँया अभाव जुयाच्वंगु हल्ला जुयाच्वंसां नं वास्तवय् नेपालय् तत्काल लुँया अभाव मजुइगु खँ नेपाल सुनचाँदी व्यवसायी संघया पुलांम्ह अध्यक्ष तेजरत्न शाक्यं ‘नेपालभाषा टाइम्स’ कनादीगु दु ।

वय्कःया कथं थौंकन्हय् बजारय् कृतिम अभाव जुयाच्वंसां नं लुँया अभाव थ्यंक धाःसा जूगु मदुनि । बजारय् अझ नं २५ प्रतिशत स्वयां अप्वः पुलांगु लुँ वयाच्वंगु धासें सरकारं पुलांगु लुँ पसल्यातय्सं न्याना कायेबलय् उकियात वैधानिकता मबिउगुलिं समस्या जुयाच्वंगु खँ नं कनादीगु दु ।

रिसाइक्लिङ यानातःगु लुँयात नं स्रोतया रुपय् क्यने दयेमाः धकाः थःपिसं माग याना वयाच्वनागु खःसां सरकारं उकियात मान्यता मबिउगुलिं छखे सरकारयात वयेमाःगु राजश्व म्हो जुयाच्वंगु दुसा मेखे व्यापारीतय्त नं हिसाब तयेत थाकुयाच्वंगु खँ वय्कलं कनादीगु दु ।
वय्कलं धयादी, ‘सुं नं मनू झि तोला लुँ मी धकाः वल धाःसा जिमिसं कायेफइगु अवस्था मदु । यदि जिमिसं उगु लुँ न्यायेत स्वल धाःसा सरकारं उकिया सोर्श माली, गुलिखे लुँ न्यायेधुंकूपिंके न्हापा लुँ न्यानागु बिल तकं मदयेधुंकी, थुकिं यानाः जिमिसं लुँ न्याये फइगु अवस्था मदु, यदि थ्व ज्यायात सरकारं वैधानिकता बिल धाःसा जिमित नं अःपुइ, सरकारयात राजश्व नं वनी ।’

वय्कःया कथं छतोला पुलांगु लुँ न्यायेबलय् म्होतिं नं बजाः भाः स्वयां द्वःछि तका क्वकयाः न्यायेगु ज्या जुयाच्वंगु दु । उकिं झितोला लुँ न्यायेबलय् झिद्वः तका जिमिसं क्वपालेगु जुइ, तर उकियात वैधानिकता मबिउगुलिं यानाः जिमिसं लबः कथं क्वपालागु ध्यबाया कर सरकारयात पुले फयाच्वंगु मदु, गुकिं यानाः छखे जिमित समस्या जुयाच्वंगु दुसा मेखे सरकारयात कर दुहां वनाच्वंगु मदु ।’

थज्याःगु समस्यायात कयाः थःपिंसं पुलांम्ह अर्थसचिव रामेश्वर खनालयात जानकारी याकागु खःसां वय्कलं थ्व ज्या यायेमाःगु खः धयादिल तर इलय् ज्या धाःसा मजूगु खँ नं भाजु शाक्यं कनादिल । उकथं हे वय्कलं तत्कालीन सहायक मन्त्री रुप ज्योतियात नं थःपिनिगु समस्या कनागु खःसां वय्कलं नं जिउ धकाः सकारात्मक लिसः बिउसां नं ज्या धाःसा जुइ मफुगु खँ कनादीगु दु ।
व

य्कःया कथं थःपिनिगु समस्यायात कयाः आपालं सरकारी निकाययात जानकारी याकेधुंकूगु खःसां नं समस्या समाधान यायेगु ज्याय् धाःसा ताः मलाःगु खँ कनादिल ।