बार्यन म्युनिख व लिभरपुल च्याम्पियन्स लिगया क्वाटरफाइनलय्

एजेन्सी- जर्मन क्लब बार्यन म्युनिख व इंग्लिस क्लब लिभरपुल च्याम्पियन्स लिगया क्वाटरफाइनलय् थ्यंगु दु । मंगलवाः चान्हय् जूगु च्याम्पिन्स लिगया निगूगु लेगया कासा बार्यन म्युनिखं साल्सबर्गयात बुकाः अन्तिम च्यागुलिइ थाय् दयेकूगु खः । मेगु कासाय् इन्टर मिलानलिसे पराजित जूसां लिभरपुलं समग्रय् कासा त्याकाः अन्तिम च्यागुलिइ थ्यंगु खः ।

मंगलवाः चान्हय् जूगु प्रि–क्वाटरफाइनलया निगूगु लेग कासाय् बार्यन म्युनिखं घरेलु मैदानय् अस्ट्रियाया क्लब रेडबुल साल्सबर्गयात ७–१ गोलया तःधंगु अन्तरं बुकूगु खः । थ्व विजय लिपा समग्रय् ८–२ गोलं कासा त्याकाः बार्यन क्वाटरफाइनलय् दुहां वंगु खः । एलिएन्ज एरिनाय् जूगु कासाय् रोर्बट लेवन्डोस्कीं कासाया शुरुवाती २३ मिनेटया दुने हे ह्याट्रिक याःगु खः । अथेहे थोमस मुलरं निगू गोल यातसा सर्ज जिनाब्री व लिरोए सोनं छगू छगू गोल याःगु खः । कासाय् साल्सवर्गया मौरिट्स काएरगार्डं छगू गोल याःगु खः ।

लिगया मेगु कासाय् इटालियन क्लब इन्टर मिलानलिसे पराजित जूसां लिभुरपुलं क्वाटरफाइनलय् थाय् दयेकूगु खः । लिभरपुलया घरेलु मैदान एनफिल्डय् जूगु कासाय् मिलानं लिभरपुलयात १–० गोल बुकूगु खः, तर न्हापांगु लेगय् २–० गोलं त्याःगु लिभरपुलं समग्र २–१ गोलं कासा ल्हातय् लाकाः क्वाटरफाइनलय् दुहांवंगु खः ।

इन्टर मिलानया नितिं कासाय् लाउटरे मार्टिनेजं छगू जक गोल याःगु खः । कासाय् इन्टरया कासामि एलेक्स सान्चेजं निगू म्हासुगु कार्ड नःगुलिं इन्टर झिम्ह कासामि सीमित जूगु खः ।