च्याम्पियन्स लिग टोटनह्याम न्हापांखुसी फाइनलय्

थुगुसीया च्याम्पियन लिग उपाधी इंग्लिस क्लबया ल्हातय्लाइगु पक्का जूगु दु । म्हिगः चान्हय् जूगु कासाय् डच क्लब आयाक्सयात बुकाः टोटनह्याम न्हापांखुसी च्याम्पियन्स लिगया फाइनलय् प्रवेश यायेवं लिग उपाधी इंग्लिस क्लबया ल्हातय् लाइगु पक्का जूगु खः । थ्वयां न्ह्यव लिभरपुल स्पेनिस क्लब बार्सायात बुकाः फाइनलय् थ्यनेधुंकूगु दु ।

टोटनह्याम सेमिफाइनलया न्हपागु लेगय् १—० गोल पराजित जूगु खःसां निगूगु लेगय् आयाक्सयात ३—२ गोल बुकाः समग्र स्वंगू स्वंगू गोलया बराबरी यानाः अवे गोलया आधारय् फाइनलय् थ्यंगु खः। म्हिगःया कासाय् नं न्हापागु हाफय् निगू गोलं लिउने लायेधुंकूगु टोटनह्यामं निगूगु हाफय् उत्कृष्ट पुनरागमन यासें स्वगू गोल याःगु खः।

टोटनह्यामया निंतिं ब्राजिलियन कासामि लुकास मौरां ह्याट्रिक याःगु खः।आयाक्सं कासाया न्यागूगु मिनेटय् १९ दँया कप्तान डि लिटया गोलं अग्रता काल । न्हापागु हाफय् हाकिम जियाचं थप छगू गोल यानाः आयाक्सयात निगू गोलया अग्रता बिल ।न्हापांगु हाफय् समग्रय् स्वंगू गोलं लिउने लायेधुंकूगु टोटनह्यामं निगूगु हाफय् उत्कृष्ट कासा म्हितल ।

ब्राजिलियन स्ट्राइकर लुकासं निगूगु हाफय् ५५ औ मिनेट न्हापांगु व ५९ मिनेटय् निगूगु गोल यात । निर्धारित ९० मिनेट तक आयाक्स समग्रय् न्ह्यःने लानाच्वंगु खःसां इन्जुरी ईइा ९६ औं मिनेटय् लुकासं थप छगू गोल यासें युवा कासामिं जाःगु आयाक्सया यात्रा क्वचायेकाबिल ।

च्याम्पियन्स लिग इतिहासय् निक्वःखुसी निगू इंग्लिस क्लब दथुइ उपाधिया निंतिं धेंधेंबल्ला जुइत्यंगु दु । सन् २००८ या च्याम्पियन्स लिग फाइनलय् म्यानचेस्टर युनाइटेड व चेल्सी उपाधिया निंतिं धेंधेंबल्ला याःगु खःसा म्यानचेस्टरं उपाधि त्याकूगु खः।लिभरपुल व टोटनह्याम च्याम्पियन्सलिग फाइनल कासा जुन १ तारिखय् मड्रिडय् म्हिती ।