ने. सं. ११४४ कछलागा सप्तमी -

रीलय् रियल रीलेशन

फिल्मया ख्यलय् छगू हे परिवारया दुजःतनाप ज्या याइगु धइगु छुं न्हूगु खँ मखु । हलिउड बलिउड अले कलिउड धकाः धयातःगु खस नेपाली फिल्म ख्यलय् नं जू । थन धाःसा आःयात बलिउडया बारे खँ न्ह्यथनेत्यनागु खः । थथे नापं ज्या याइबलय् वा नापं एक्टिंग याइबलय् उमिगु धाथेंयागु नातायात हे पर्दाय् न्ह्यब्वयेगु नं याः । यानिकि इमिसं फिल्मया रीलय् रियल परिवार जुयाः नं म्हितेगु याः ।

सलमान खानया निम्ह किजापिं दु, अरबाज खान व सोहेल खान अले सलमानं अरबाज व सोहेललिसे तःगू फिल्म म्हितातःगु दु । अज्याःगु फिल्म मध्ये गुलिखे फिल्मय् इमिसं रियल रिलेशन मखसे मेगु हे रिलेशन क्यनातःगु दइ । उकी मध्ये सलमान खानं “दबंग” फिल्मय् जक दाजुकिजा जुयाः हे म्हितातःगु दु ।

मखु धइगु खःसा “प्यार किया तो डरना क्या” फिल्मय् ला काजोलया हारांम्ह दाजु जुयाः म्हितूगु खःसा सोहेल खान नं सलमान लिसे तःगू फिल्म म्हितूगु दु तर “वीर” व “ट्युबलाइट”य् जक दाजु किजा हे जुयाः म्हितूगु खः ।बलिउडया बीग बी अमिताभ बच्चन व वया जहान जया बच्चनं अभिमान, सिलसिला व कभी खुशी कभी गम फिल्मय् जक कलाःभाःत जुयाः हे म्हितूगु दुसा वय्कःभाजुं थः काय अभिषेक बच्चनलिसे नं नापं तःगू फिल्म म्हितूगु दु ।

उकी मध्ये “बन्टि और बब्ली” फिल्मय् अमिताभ बच्चन ला अभिषेक बच्चनयात लिना जुइम्ह पुलिस अफिसर जुयाः म्हितातःगु दु । “पा” नांयागु फिल्मय् ला अभिषेक बच्चनं अमिताभ बच्चनया अबु जुयाःतकं म्हितूगु दु । तर “सरकार”व “कभी अलविदा ना कहना”य् धाःसा इपिं अबु–काय हे जुयाः म्हितूगु खः ।

बलिउडया सुपरस्टार राजेश खन्नां थः तिरीमय्जु डिम्पल कपाडियालिसे कलाःभाःत हे जुयाः “जय शिव शंकर”नांयागु छगू फिल्म म्हितूगु दु । तर उगु फिल्म धाःसा रिलिज हे मजुल । अथे हे ऋषि कपुर व नीतु सिंहं थः काय रणवीर कपुर हिरो जुयाः वयेधुंकाः थः काय्लिसे “बेशर्म” नांयागु छगू फिल्म म्हितल ।

तर थ्व फिल्मय् ऋषि व नीतु कलाःभाःत जुया म्हिताच्वंसां रणवीर कपुर धाःसा इमि काय जुयाः म्हितूगु मखु । फिल्मया पर्दाय् नापं म्हितूपिं परिवारया दुजःतय्सं आपालं यानाः रियल रिलेशन मखसे रिल रिलेशनजक न्ह्यब्वइगु खः । शशी कपुर व ऋषि कपुर धइपिं कका व कायचा खः । तर गुलिखे फिल्मय् इमिसं पासा जुयाः म्हितूगु दुसा “कभी कभी”फिल्मय् अबु व काय जुयाः म्हितल ।

आ वयाः अनिल कपुर व वया काय्चा अर्जुन कपुरं “मुबारकां” फिल्मय् कका व कायचा हे जुयाः म्हितल ।आपाःसिनं सिउ हे जुइमा कि सञ्जय दत्तया जीवनीया लिधंसाय् दयेकूगु “सञ्जु” आः रिलिज जुइत्यंगु दु । थ्व फिल्मय् सञ्जय दत्त जुया रणवीर कपुरं म्हितूगु दुसा वया अबु सुनिल दत्तया रोलय् परेश रावल व मां नर्गिसया रोलय् मनिषा कोईराला खनेदयेकः वयेत्यंगु दु ।

सञ्जय दत्तयात वया अबु सुनिल दत्तं हे “रकी” फिल्मय् हिरो याःगु खःसा थ्व फिल्मय् सुनिल दत्तं सञ्जय दत्तया अबुया रुपय् बःचाधंगु रोल याःगु दु तर इपिं निम्हं नापं क्यनीगु लु धाःसा मदु । लिपा वना “मुन्नाभाई एमबीबीएस”फिल्मय् तिनि सुनिल दत्त व सञ्जय दत्त अबु कायया रुपय् छपाः हे पर्दाय् खनेदयेकःवःगु खः ।

अथे हे तुं राजेन्द्र कुमार व कुमार गौरव “लभस्टोरी” फिल्मय् अबु काय जुयाः म्हितूगु दुसा विनोद खन्नां थः काय अक्षय खन्नाया अबु जुयाः “हिमालय् पुत्र” म्हितल । थः काय् ऋतिक रोशनलिसे ‘कहो ना प्यार है’, ‘कोई मिल गया’, ‘कृश २’ व ‘कृश ३’ दयेकूम्ह निर्देशक राकेश रोशनं “कोइ मिल गया” छगू फिल्मय् जक ऋतिक रोशनया अबु जुयाः म्हितल तर इपिं निम्हं नापं वइगु लु धाःसा मदु ।

पुलांम्ह हिरो धर्मेन्द्रया निम्ह काय सनी देवल व बबी देवल । इपिं स्वंम्ह “अपने” फिल्मय् रियल रिलेशनय् खनेदतसा “यमला पगला दिवाना” फिल्मय् नं इपिं स्वंम्ह नापं म्हितूसां उमिगु रिलेशन धाःसा फिल्मी रिलेशन जुल । सनी देवल व बबी देवलं “दिल्लगी” फिल्मय् दाजु किजा हे जुयाः म्हितूगु दु । धर्मेन्द्रया हेमा मालिनी पाखें निम्ह म्ह्याय् दु ।

उकी मध्ये ईशा देवल ला हिरोइन हे खःसां धर्मेन्द्रं “टेल मी ओ खुदा” फिल्मय् बाहेक मेगुलि वनाप म्हितूगु मदु । थ्व फिल्मय् धाःसा उपिं निम्ह अबु व म्ह्याय् हे जुयाः म्हितातःगु दु । थ्व फिल्मया निर्देशक हेमा मालिनी हे खः । जितेन्द्रया काय् तुषार कपुरं जितेन्द्रया म्ह्याय् एकता कपुरया कम्पनीं दयेकूगु फिल्म म्हितल तर थः अबुलिसे धाःसा “कुछ तो है” छगू फिल्म जक म्हितूगु दु ।

अथे हे तुं शाहिद कपुरं थः मां निलिमा अजिमलिसे रियल रिलेशन कथं काय व मां जुयाः म्हितूगु फिल्मया नां “ईश्क विश्क”खः ।
खय्तला बलिउडय् छगू हे परिवारं वःपिं कलाकार आपालं दु । इपिं मध्ये गुलिखेसिनं नापं म्हिते मखंनिसा नापं म्हितूपिनि रियल रिलेशन क्यने कथं म्हिते मखने यः ।

दाजुम्ह रणधीर कपुरया म्ह्याय् करीना कपुर व किजाम्ह ऋषि कपुरया काय रणवीर कपुर नं आतक छुं नं फिल्मय् नापं म्हितूगु मदुनिसा दाजुम्ह बोनी कपुरया काय अर्जुन कपुर व किजाम्ह अनिल कपुरया म्ह्याय् सोनम कपुर नं छपाः हे पर्दाय् खनेमदुनि ।

थथे तःकेहँे कलाकारपिं मध्ये शक्ती कपुरया म्ह्याय् श्रद्धा कपुर व काय सिद्धान्त कपुर “हसिना” फिल्मय् तःकेहँे हे जुयाः म्हिते खनसा हुमा कुरैशी नांयाम्ह हिरोइनया किजा शाकीब नं तता व किजा जुयाः “दोबारा” नांयागु फिल्मय् म्हितूगु दु ।हिन्दी फिल्मया संसारय् सलमान खानया खान परिवार थौंकन्हय् बय्बय् जुयाच्वं थें हे न्हापा राज कपुरया कपुर खानदान धाल कि तसकं हे नांजाः ।

थ्व परिवारय् राज कपुरया अबु पृथ्वीराज कपुर छम्ह नांजाःम्ह कलाकार खःसा राज कपुरया बारे ला आपाःसिनं सिउ जुइमाः । पृथ्वीराज कपुरया स्वम्ह कायपिं दु– राजकपुर, शम्मी कपुर व शशी कपुर ।इपिं स्वम्हं वा स्वम्हे निम्ह नापं म्हितूगु फिल्म मदु । बरु पृथ्वीराज कपुरं “आवारा” फिल्मय् राज कपुर व शशी कपुरया अबु जुयाः म्हितूगु दु । थ्व फिल्मय् शशी कपुरं राज कपुरया मचाबलय्या रोल म्हितूगु खः ।

अनं लिपा वनाः “कल आज और कल” फिल्मय् पृथ्वीराज कपुरं हाकनं राज कपुरया अबु जुयाः म्हितलसा थ्व फिल्मय् कपुर खानदानया स्वंगूगु पुस्ताया कलाकार रणधीर कपुरं राज कपुरया काय अले पृथ्वीराज कपुरया छय् जुयाः म्हितल । थुकथं छपाः हे पर्दाय् बाज्या, अबु व कायया स्वंगू पुस्ताया रियल रिलेशन मेगु छुं नं फिल्मय् आःतक खनेमदुनि धाःसां छुं पाइ मखु ।