ने. सं. ११४६ तछलाथ्व दशमी -

ख्वप नपाया एफएम संचालन व प्राविधिक शीप तालिम

ख्वप – ख्वप नगरपालिकाया ग्वसालय् एफएम रेडियो संचालन व प्राविधिक शीप सम्बन्धी प्रशिक्षण शुरु जूगु दु । नगरपालिकां नगरवासी ल्याय्म्हतय्त लक्षित यानाः एफएम रेडियो न्ह्याकेगु व प्राविधिक सम्बन्धी प्रशिक्षण शुरु याःगु खः ।
भक्तपुर एफएमया प्राविधिक ग्वाहालिं वंगु आइतवाःनिसें शुरु जूगु तालिमया उलेज्या ख्वप नगरपालिकाया प्रमुख सुनील प्रजापतिं यानादीगु खः ।

तािलमया उलेज्या यासें प्रमुख प्रजापतिं न्हू पुस्तायात थःगु हे तुतिइ दने फइगु शीप बीगु उद्देश्यं नगरपालिकां ल्याय्म्हतय्त लक्षित यानाः थीथीकथंया तालिम न्ह्याका वयाच्वनागु जानकारी बियादिल ।नगरपालिकां थःगु हे रेडियो व टेलिभिजन संचालन यायेगु तयारी यानाच्वनागु खँ न्ह्यथँसें वय्कलं जनशक्तिया उत्पादनया निंतिं हे थुगु तालिम न्ह्याकागु खः धयादिल ।

‘थः बूगु व ब्वलंगु समाज व देय्या सेवा यायेत ल्याय्म्हतय्सं म्होतिं नं छगू शीप सयेकेमाः’, प्रमुख प्रजापतिं धयादिल, ‘विदेशी भूमिइ हिचःचि हायेकेगु निंतिं ल्याय्म्हतय् शक्ति प्रयोग जुइ मजिउ ।’नगरपालिकाया उपप्रमुख रजनी जोशीं तालिम कायेगु जक मखसे तालिमय् प्राप्त शीपयात व्यवहारय् नं छ्यलेमाःगु खँय् बः बियादिसें नगरपालिकायात ल्याय्म्हतय् उचित सल्लाह व सुझावया नं आवश्यक जूगु धयादिल ।

वडा नं ९ या वडाअध्यक्ष रविन्द्र ज्याख्वं तालिमय् सहभागि ल्याय्म्हत नं नगरपालिकाया हे दुजः खः धासें आः ल्याय्म्हत थःगु विषयय् दक्षता हासिल यानाः देय्या भूगोल, राजनीति, सामाजिक अवस्थाया बारे नं जानकार जुइगु स्वयेमाः धयादिल ।

ज्याझ्वलय् भक्तपुर एफएमया अध्यक्ष मार्शल राठोरं व प्रबन्ध निर्देशक विजय हाछेँथुं तालिमय् नियमितरुपं उपस्थिति जुइगु व अनुशासनपूर्वक सहभागि जुइत प्रशिक्षार्थीतय्त इनाप यानादिल ।ख्वप नगरपालिकाया ग्वसालय् वंगु आइतवाःनिसें ख्वप कलेजय् जुयाच्वंगु तालिम वइगु जेठ २९ गतेतक न्ह्याइ ।