मरुसतः ठेक्कां दयेके मबीत माग

येँ – मरुसतः पुनर्निर्माणया ज्या न्ह्याकीगु चर्चाया नापनापं थ्व पुनर्निर्माणया ज्या सम्पदा सम्बन्धी मापदण्ड कथं हे जुइमाः धइगु सः नं थ्वया वःगु दु । नापं थ्व मरुसतः निर्माण यायेगु ज्याय् जनस्तरया निर्णयकारी भूमिका दयेमाः धइगु माग नं याना हःगु दु ।

मरुसतः जनस्तरं हे दयेकेगु धइगु ताः तयाः गठन यानातःगु ‘काष्ठमण्डप पुनःनिर्माणको लागि अभियान’ पाखें कार्यवाहक अध्यक्ष बैकुण्ठ मानन्धरं थन छगू वक्तव्य पिकासें थ्व माग यानादीगु खः । मरुसतः दयेकेगु ज्या जनस्तरया ग्वाहालि कयाः थःपिनिगु हे नेतृत्वय् यायेगु दावी थ्व अभियानं याना वयाच्वंगु खःसा उकिया लागिं छुं भचा ज्या समेत जुइधुंकूगु खः । तर येँ मनपाय् निर्वाचित जनप्रतिनिधि वयेधुंकाः अभियानया थ्व ज्या न्ह्याः वने मफुत ।

अभियानं मरुसतः दयेकेगु जिम्मा थःपिंत बिल धाःसा सरकारपाखें छुं कथंया आर्थिक ग्वाहालि मवःसां नं जनस्तरं हे आर्थिक संकलन यानाः ज्या न्ह्याकेगु व विदेशपाखें छुं हे कथंया सहयोग काये मखु धकाः नं स्पष्ट याःगु दु । तर थःपिनि नेतृत्वय् मरुसतः दयेकेगु खँ यदि मनपा व सरकारी निकायतय्त स्वीकार्य मदुसा थःपिं नेतृत्व त्वःतेत तयार दुगु संकेत नं वक्तव्यय् बियातःगु दु ।

यदि थःपिंसं धयाच्वनागु मान्यता अनुरुप पुनर्निर्माण जुइगु खःसा थःपिं न्ह्यागु कथंया नं ग्वाहालि यायेत तयार दुगु खँ नं वक्तव्यय् धयातःगु दु । अभियानं मरुसतःया पुनर्निर्माण परम्परागत प्रविधि छ्यलाः हे जुइमाः धासें ठेक्कापट्टपाखें थ्व ज्या याके दइ मखु धकाः नं धाःगु दु ।मरुसतः पुनर्निर्माणया सवालय् मनपा व पुरातत्व विभाग दथुया विवाद धाःसा समाधान जुइधुंकूगु खँ सीदुगु दु ।