आः सरकार पुनर्गठन गबले ?

मन्त्री जुइ धकाः पियाच्वंपिं सांसदत आय्बुयाच्वन

येँ  – प्रधान–मन्त्री शर्मा ओलीं सरकार गठन याःगु दछि फुइवं हे मन्त्रिमण्डल पुनर्गठन जुइ धकाः पिहां वयाच्वंगु चर्चा आः तकं पूरा जूगु मदुनि । अन्तिमय् चिनियाँ राष्ट्रपतिया नेपाः भ्रमण क्वचायेवं हे मन्त्रिमण्डल पुनर्गठन जुइ धाःगु खःसां चिनियाँ राष्ट्रपति भ्रमण क्वचायेकाः लिहां वनेधुंकल तर पुनर्गठनया संकेत धाःसा गनं वःगु मदुनि ।

प्रधानमन्त्री केपी ओली कार्तिक ७ गते विदेश वनेगु तयारी जुयाच्वंगु दु । उकिं मन्त्रिमण्डल व स्वयां न्ह्यः पुनर्गठन जुइगु सम्भावना मदु ।
म्हिगः जूगु नेकपाया तुच्चा ज्याझ्वलय् ब्वति काः वःपिं अधिकांश मनूतय्सं नं मन्त्रिमण्डल पुनर्गठन गबले धकाः नेतातय्त खुब न्यनेगु यात । तर लिसः सुनां बी मफु ।

मन्त्रिमण्डल पुनर्गठनया चर्चा जुयाच्वंगु हे इलय् आकाझाकां सभामुख समेत हिले मालीगु राजनीतिक अवस्था पिहां वःगु जुयाः आः नेकपाया ध्यान उखेपाखे निं वनाच्वंगु दु । सभामुख कृष्णबहादुर महरा पदमुक्त जुइवं वय्कःया थासय् सुयात सभामुख दयेकेगु धइगु खँय् पार्टी दुने हे विवाद पिहां वयेवं मन्त्रिमण्डल पुनर्गठनया ज्या आःयात लिपा लाःवंगु खँ धाःगु दु ।

खुला न्ह्यः प्रधानमन्त्री ओलीं थःगु सरकारया मन्त्रीतय्गु ज्याया आधारय् रेटिङ समेत यासें पुनर्गठन जुइबलय् सु सु लिकायेगु व सु सु तयेगु धकाः छगू खाका समेत तयार यानादी धुंकूगु खः । तर आः उकियात कार्यान्वयन याये धाःसा फयाच्वंगु मदु ।पार्टी एकीकरणया ज्या क्वचायेवं उकी न्ह्यंके मफुपिं महत्वपूर्ण मनूतय्त सरकारय् जूसां थाय् बियाः ‘एडजस्ट’ यायेगु तयारी कथं नं मन्त्रिमण्डल पुनर्गठनया चर्चा जूगु खः ।

नेपाल कम्युनिष्ट पार्टीया तुच्चा
सत्तारुढ पार्टी नेपाल कम्युनिष्ट पार्टीं मोहनि, स्वन्ति लिसें नेपाल संवत्या न्हूदँ ११४० या लसताय् म्हिगः तुच्चा ज्याझ्वः यात । थनया भृकुटी मण्डपय् याःगु उगु तुच्चाय् देय्या सकलें तःधंगु राजनीतिक दलया नेतातय्सं ब्वति काःगु खः । ज्याझ्वलय् नेपाली कांग्रेसया सभापति शेरबहादुर देउवा लिसें राप्रपाया अध्यक्ष कमल थापां नं ब्वति काःगु दु ।

ज्याझ्वलय् प्रधानमन्त्री लिसें नेकपाया अध्यक्ष केपी ओली व मेम्ह अध्यक्ष पुष्पकमल दाहाल निम्हेस्यां जक सम्बोधन यानादीगु खः । थःगु सम्बोधनया झ्वलय् प्रधानमन्त्री ओलीं थौंकन्हय् सामाजिक सञ्जालय् छाडा खँ च्वइपिं मनूत तसकं अप्वःगु धासें नेपाःमितय्सं धमाधम थःगु संस्कार त्वःतु त्वःतुं वनाच्वंगु खँय् दुःख प्वंकादिल ।

तुच्चा ज्याझ्वलय् वःपिंत केरा, लड्डु, निम्की व समोसा नकेगु ज्या जूगु खः । ज्याझ्वलय् पार्टीया आपालं कार्यकर्तातय्सं ब्वति काःगु खः । सहभागीतय् दथुइ चिनियाँ राष्ट्रपतिया नेपाः भ्रमण, मन्त्रिमण्डल पुनर्गठन, आः जुइगु उपचुनावय् उम्मेदवारी, सरकारया गतिविधि, भारतं बीगु प्रतिक्रिया आदिया बारे अप्वः चर्चा जुयाच्वंगु खः ।

सम्बन्धित बुखँ

LEAVE YOUR COMMENTS