क्षतिग्रस्त दरवार हाइस्कुल पुनःनिर्माण शुरु

येँ – देय्या दकलय् पुलांगु व ऐतिहासिक स्कुल मध्ये छगू दरवार हाइस्कुलया पुनःनिर्माण शुरु जूगु दु । ज्या शुरु जूगु करिब दत्याया दुने हे निर्माण सिधयेकेगु लक्ष्यं पुनःनिर्माण शुरु याःगु खः । २०७२ सालया तःभुखाचं पूर्णरुपं स्कुल पूर्णरुपं क्षति जुइवं विद्यार्थीतय्त पिने टहरा दयेकाः अध्यापन याका वयाच्वंगु खः ।

क्षतिग्रस्त स्कुल पुनःनिर्माणया निंतिं पुलांगु संरचना दक्वं थुनेगु ज्या सिधयेवं पुनःनिर्माणया ज्यायात औपचारिकता बिउगु खः । चीन सरकारया पूर्ण ग्वाहालिइ चिनिया निर्माण कम्पनी सांघाई कन्स्ट्रक्सनं पुनःनिर्माणया ज्या याइगु जूगु दुसा नेपाली कामदारलिसें चिनिया पुचलं नं ग्वाहालि याइगु जूगु दु ।

करिब ८० करोड लागतय् निर्माण जुइगु विद्यालय पुनःनिर्माणया ज्या १९ महिना दुने क्वचायेकाः नेपाल सरकारयात लःल्हायेगु ज्या जुइ । तःभुखाचं अति प्रभावित जूगु झिंप्यंगुलिं जिल्लाया छगू छगू व मेगु स्वंगू जिल्लाय् यानाः झिंन्हय्गू विद्यालय पुनःनिर्माण यायेगु सहमति जूकथं चिनिया सरकारं दरवार हाइस्कुल पुनःनिर्माण यायेत्यंगु खः ।

वि.सं. १९१० य् तत्कालीन प्रधानमन्त्री जंगबहादुर राणां थः सन्तान व राणातय् थः मस्तय्त आखः ब्वंकेगु निंतिं धकाः उगु विद्यालय स्थापना याःगु खः । विद्यालय स्थापना जूगु ताःई लिपा जक सर्वसाधारणया मस्तय्त नं ब्वंकेगु याःगु खः । सन् १९६४ या इलय् सर्वसाधारणया मस्तय्सं नं ब्वने दइगु व्यवस्था याःसां अबलय् संस्कृत ब्वनीपिनिगु निंतिं जक खुल्ला याःगु खःसा २०४८ सालय् वयाः जक सर्वसाधारणया निंतिं पूर्णरुपं खुल्ला याःगु खः ।

स्थापनाया इलय् निःशुल्क ब्वंकेगु याःगु स्कुलय् २०३० सालय् राष्ट्रिय शिक्षा पद्धति लागू जुइधुंकाः जक विद्यालय शिक्षा ज्याकूपाखें उगु विद्यालय संचालन जुया वयाच्वंगु खः । आः विद्यालय पुनःनिर्माण याइबलय् पिने पुलांगु हे संरचनायात यथावत तयाः दुने धाःसा आधुनिक निर्माण साम्रगी प्रयोग याइगु जूगु दु ।