मू प्रशिक्षक योहान थांै वइगु

येँ – नेपाली राष्ट्रिय फुटबल टिमया मू प्रशिक्षक योहान कालिन थौं बिहिवाः येँय् थ्यंकः वइगु जूगु दु । अखिल नेपाल फुटबल संघ (एन्फां) वंगु माघ ३ गते योहानयात मू प्रशिक्षक नियुक्त याःगु खः । मू प्रशिक्षक नियुक्त जुइधुंकाः कालिन थौं नेपाः वयाः थःगु पदभार लःल्हाना कायेत्यंगु खः ।

एन्फां योहानयात निदँयात निंतिं नेपाःया राष्ट्रिय टिम स्वयेगु जिम्मेवारी बिउगु खः । सम्झौता कथं योहानं २०१९या मार्च १ निसें २०२१ या फेबु्रअरी २८ तक नेपाली टिमया प्रशिक्षण याइ ।थ्वयां न्ह्यः नेपाली टिम स्वयाच्वनादीम्ह विदेशी प्रशिक्षक जापानया ग्यातुको कोजी भिसाया कारणं वंगु भदौ निसें नेपाः वयेमफयेवं योहानयात न्हूम्ह प्रशिक्षक ल्यःगु खः ।

एन्फां हे श्रम स्वीकृतिया प्रक्रिया न्ह्याका मबिउगुलिं कोजी नेपाः वयेमखंगु खः । कोजी लिसेया सम्झौता धाःसा वंगु डिसेम्बर तक दुगु खः ।
आः नेपाःया राष्ट्रिय टिमया मू प्रशिक्षक जुइम्ह योहान २०७० सालय् मच्छिन्द्र क्लबया मू प्रशिक्षक जुयादी धुंकूम्ह खः । योहानया नेतृत्वय् दुगु इलय् मच्छिन्द्र क्लब ए डिभिजन लिगय् निगूगु थासय् तक थ्यंगु खः । योहानं स्वीडेनया स्वंगूगु डिभिजन क्लबं निसें व्यावसायिक प्रशिक्षक सुरु याना वःम्ह खः ।