त्रिशुली ए अन्तिम चरणय्

बेत्रावती – रसुवाय् बाँध व नुवाकोटय् विद्युत उत्पादन गृह तयाः दयेकूगु ६० मेगावाट क्षमताया माथिल्लो त्रिशुली थ्री ए जलविद्युत आयोजना दयेके ज्या अन्तिम चरणय् थ्यंगु दु । वइगु असार दुने मत उत्पादन यायेगु लक्ष्य तयाः दयेकाच्वंगु थ्व आयोजनाया आःतक मुक्कं ९० प्रतिशत ज्या क्वचायेधुंकूगु खँ आयोजनाया प्रमुख फणिन्द्रराज जोशीं कनादिल ।

वय्कःया कथं आयोजनाया सिभिलपाखे ९८ प्रतिशत, इलेक्ट्रोमेकानिकलपाखे ७५ प्रतिशत व हाइड्रोमेकानिकलपाखे ८८ प्रतिशत लिसें प्रशारण लाइन विस्तापाखे ९५ प्रतिशत ज्या पूवनेधुंकूगु दु ।

‘आयोजना दयेकेगु निंतिं निर्माण व्यवसायीतय्त बियातःगु ई दुने ज्या पूवंकेगु निंतिं सहजीकरण व दबाब बीगु ज्या निरन्तर जुल’ वय्कलं धयादीगु दु, ‘उकिं ३०÷३० मेगवाट क्षमताया निगः मध्ये छगः टर्बाइन वैशाख दुने व मेगु असार दुने संचालन यायेगुकथं बिजुली उत्पादन यायेफइगु अवस्थाय् थ्यंगु दु ।’

आयोजनाया मू संरचना हेडवक््रस (बाँध), सुरुङ्ग व विद्युत गृहया परीक्षण वइगु चैत १ गते निसें सुरु यायेत्यनागु खँ आयोजनाया उपप्रबन्धक इन्जिनियर सत्यराम ज्याख्वां धयादीगु दु । वैशाख १५ तक परीक्षण ई काइगु व थ्व धुनेवं विद्युत उत्पादन सुरु यायेगु कथं निर्माण ज्या न्ह्यानाच्वंगु दु ।

मुक्कं उत्पादनया ४६.६ प्रतिशत मत सुख्खायामय् उत्पादन जुइगु जूगुलिं देशय् आवश्यक इलय् मत आपूर्ति यायेत थ्व आयोजनायात महत्वपूर्ण रुपं कयातःगु दु

‘आयोजना पाखें ३० मेगवाट मत वि.सं. २०७६ वैशाख १७ गते उत्पादन सुरु यायेगु लक्ष्य दु’ वय्कलं धयादिल ।उत्पादन जूगु मत केन्द्रीय प्रसारण लाइन तक जडान यायेगु निंतिं त्रिशुली–काठमाडौं २२० केभी डबल सर्किट प्रसारण लाइन निर्माणया समन्वय व व्यवस्थापन जिम्मा थ्री ए आयोजना पाखें हे जुयाच्वंगु दु ।

थ्व आयोजनाया निर्माण चाइना गेजुवा ग्रुप अफ कम्पनी –सिजीजिसीं) यानाच्वंगु दु । थ्व कम्पनीं सन् २०११ जुननिसें ज्या सुरु याःगु खः । थ्व आयोजना दयेकेगु निंतिं कम्पनी लिसे इन्जिनियरिङ्ग, प्रोक्युरमेन्ट व कन्स्ट्रक्सन (इपिसी) अवधारणाय् सम्झौता जूगु खः ।
वि.सं. २०७२ वैशाख १२या तःभुखाचं यक्व क्षति याःगु थ्व आयोजना मू संरचना निर्माणय् निर्माण व्यवसायीतय्त आःतक छुं भेरिएशन बिउगु मदुनि ।

भुखाचं आयोजनाया बाँधस्थल तक थ्यंकीगु पहुँच मार्गय् लाकूगु क्षति पुनःनिर्माण व अन दिर्घकालिन रुपं चलः पनेगु निंतिं ज्या यायेगु लागि नेपाल सरकारया मन्त्रिपरिषदया निर्णय कथं नेपाली सेनापाखें ज्या सुरु जुयाच्वंगु दु ।त्रिशुली खुसीया लखय् ‘रन अफ रिभर’ मोडलय् निर्माण जूगु थ्व आयोजनापाखें दँय् ४८९.७६ गिगावाट मत उत्पादन यायेगु लक्ष्य तयातःगु दु ।

आयोजना पूवंक संचालन वयेधुंकाः थनं उत्पादन जुइगु मतं दँय् स्वंगू अर्ब आम्दानी याइ । त्रिशुली खुसिइ लाःगु रसुवाया डाँडागामय् बाँध दयेकाः नुवाकोटया मनकामनाय् उत्पादन गृह तयातःगु थ्व आयोजनाया निर्माण फुक्कं भूमिगत (पहाड दुने) जुयाच्वंगु दु । आयोजनां च्यालात्या पूवंक (६० मेगावाट) हे मत उत्पादन जुइ ।

मुक्कं उत्पादनया ४६.६ प्रतिशत मत सुख्खायामय् उत्पादन जुइगु जूगुलिं देशय् आवश्यक इलय् मत आपूर्ति यायेत थ्व आयोजनायात महत्वपूर्ण रुपं कयातःगु इन्जिनियर ज्याख्वानं कनादिल । वय्कःया कथं थ्व आयोजना क्वचायेवं सहायक योजना –क्यासकेड) पाखें ३७ मेगावाट क्षमताया माथिल्लो त्रिशुली थ्री बी आयोजना संचालनय् हयेत निर्माण ज्या न्ह्याकूगु दु । थ्री बीयात स्वदँ दुने क्वचायेकेगु कथं थगुने फागुन निसें ज्या सुरु याःगु खः ।

सम्बन्धित बुखँ

LEAVE YOUR COMMENTS