भिटामिन ईं झीत याइगु फाइदा

छिं न्यनातयादीगु हे दयेमाः कि झीगु स्वस्थ यानातयेत थीथी भिटामिन नं मदयेक मगाः । प्रत्येक भिटामिनया थःथःगु हे महत्व दु । भिटामिनं झीत जुइफुगु थीथी ल्वय्पाखें नं झीत रक्षा यानातइ । भिटामिन ‘ईं’ नं झीत स्वस्थ यानातयेत ग्वाहालि याइ । बजारय् दइगु थ्यंमथ्यं फुक्क हे स्किन केयर प्रोडक्टय् भिटामिन ‘ई’ छगू मदयेक मगाःगु इंग्रीडिएंटया ल्याखं तयातःगु दइ । छाय्कि थुकिं स्किन (skin) व हेयर (Hair)यात स्वस्थ यायेगुया लिसेलिसें स्ट्रेच माक्र्स (stretch marks) पिंपल्स (Pimples) या दाग मदयेकाः ड्राइस्किनपाखें मुक्ति बी ।

थुपिं फाइदा बाहेक भिटामिन ईलय् उगु एन्टिअक्सिडेन्टसं एजिंगया दक्वं चिं मदयेकाछ्वयेत ग्वाहालि याइ । छिं गबलें नं गनं केमिस्टया पसलय् वनाः ‘स्किन लोसन’ अथवा ‘अन्डर आइ क्रिम’ माल धकाः धयादिल धाःसा छितः भिटामिन ईया क्याप्सुल ख्वालय् बुलादिसँ धकाः सल्हा बी । उकिं अलमल यानादी हे मते, भिटामिन ईया फाइदा छिं नं काये सयेकादिसँ ।

भिटामिन ई मगातकि मांसपेशि कमजोर जुइ । मिखा कमजोर जुयावनी आदि । भिटामिन ई झीगु म्हयात माःगु छगू कारण थ्व नं खःकि थुकिं म्हय् ह्याउँगु हिकोष दयेकेगु ज्या याइ । थुकिं म्हय् कोलेस्टेरोलयात नियन्त्रणय् तयातइ । थुकिं मानसिक रुपं त्यानुगु नं लंका बी । थुकिं शारीरिक फाइदा जक मखु सौन्दर्य थकायेगु ज्याय् नं ग्वाहालि याइ ।

भिटामिन ई लय् एन्टिएजिंग गुण दु । थुकिया छ्यलाबुलां छ्यंगुलिइ ‘ग्लो’ (skin glow) वइ । ला हय्हय्कुंगु चकनावइ आदि । भिटामिन ‘ई’या चिकनं छिं मालिस नं यानादीफु, अले फेसप्याक (Facepack) य् नं तयादीफु ।

भिटामिन ‘ई’या स्रोत
वाउँचा तरकारि न्ह्यागुं, रोस्टेड मसला –काजु, बरां आदि), सलगम, चाकुहि, ख्येँ, अं, ब्रोकाउलि, छ्व, थीथी केँ व बूब आदि भिटामिन ईया स्रोत खः । थ्व दक्व चीज नयाः झीसं झीगु म्हय् भिटामिन ई या पूर्ति यायेफइ ।
छ्यंगूयात फाइदा
भिटामिन ई छ्यंगूयात तसकं हे फाइदा याइगु चीज खः । थुकिं छ्यंगूया सिनावंगु कोष व हाकुगु दाग वंकेगु ज्या याइ । थुकिया लिसें छ्यंगूयात नाइसे च्वंकाः यचुपिचु धायेकाबी ।
मानसिक तनावं मुक्ति
म्हय् भिटामिन ‘ई’ गाक्क दत कि झीत मानसिक समस्या कम जुइ, अले तनाव नं जुइमखु । धाथें ला छुं छुं रिसर्चं सीदयेधुंकूगु दु कि भिटामिन ई मगातकि थीथी मानसिक समस्या जुइफु ।
क्यान्सरपाखें रक्षा
भिटामिन ‘ई’ क्यान्सर थेंज्याःगु ग्यानापुगु ल्वय्लिसे ल्वायेत नं ग्वाहालि याः । क्यान्सर मजुइकेत झीसं छ्व, केँ, बूबः व काजु बरां थेंज्याःगु मसालाया सेवन नं यानाच्वने माः । थज्याःगु नसाज्वलनय् दुगु भिटामिन ई छितः नुगःस्येँ सम्बन्धि ल्वय् व क्यान्सरपाखें रक्षा यानातइ ।
प्वाथय् दुपिं मिसातय्त
भिटामिन ई रेड ब्लड सेल्स (ह्याउँगु हिकोष) दयेकीगु जूगुलिं प्वाथय् दुपिं मिसातय्सं थुकिया सेवन याये हे माः । उमिसं भिटामिन ईया सेवन मयात धाःसा इमिसं बुइकीपिं मस्तय्त ‘एनीमिया’ (हि मगाइगु ल्वय्) जुइगु खतरा दइ ।
भिटामिन ईया मेमेगु फाइदा
– भिटामिन ई । एलर्जीयात पनेत ग्वाहालि याइ ।
– थुकिं इम्यून सिस्टम बल्लाइ ।
– शारीरिक क्षमता अप्वयेकाबी ।
– छ्यंगू सम्बन्धी थीथी समस्या ज्यंकाबी ।
– हाइब्लड प्रेसर बढे जुइ मफयेक पनातइ ।
– थुकिं थीथी वासलं जुइगु साइड इफेक्टयात पनेत नं ग्वाहालि याइ ।
– भिटामिन ईया क्याप्सुल सँ ताःहाकः, ख्वातु व चमकदार दयेकेत छ्यलेगु याइ ।
भिटामिन ई मगात धाःसा
– भिटामिन ई मगात कि बहनी मिखा मछुयावनी ।
– म्हया क्वें बमलानावनी ।
– आकाझाकां म्ह त्यानुयावइ ।
– गिजां हि वइगु जुयावइ ।
– घाः जुल धाःसा याकनं लनीमखु ।
– गर्मिबलय् न्हासि वइ ।
– थ्व मगात कि झीगु म्ह भिटामिन ए नं फुनावनी ।
– ब्वमलंनिपिं ह्याउँमस्तय् म्हय् हि मगानावनी ।
नोट भिटामिन ई प्राकृतिक स्रोतं हे जक फाइदा याइ । अथे जूगुलिं गुलिफु उलि भिटामिन ई दुगु नसाज्वलं हे नयेगु यानादिसँ ।

सम्बन्धित बुखँ

LEAVE YOUR COMMENTS