‘रास्वपाय् नेवाः काय्मचायात अन्याय !’
येँ (नेपालभाषा टाइम्स) – राष्ट्रिय स्वतन्त्र पार्टीया न्हापांगु महाधिवेशनय् त्यानावःपिं केन्द्रीय सदस्यपिंत म्हिगः रास्वपाया मू ज्याकुथिइ शपथ ग्रहण याकूगु दु । केन्द्रीय सदस्य निर्वाचनयात कयाः विवादय् लाःपिं निम्हेसित धाःसा शपथ ग्रहण मयाकू । चितवनय् जूगु महाधिवेशनं ९९ म्ह केन्द्रीय सदस्य निर्वाचित याःगु खः, तर म्हिगः ९७ म्हेसिया जक शपथ ग्रहण जूगु खः ।
रास्वपाया निर्वाचन आयोगं केन्द्रीय सदस्य निर्वाचनया लिच्वः पिकायेधुंकाः नं संशोधन यानाः निम्हेसिया नां लिकयाः उकिया थासय् मेपिं निम्हेसिया नां तःगु खः । गुकी गण्डकी प्रदेशपाखें प्यंगूगु थासय् निर्वाचित जूम्ह सोम शर्मायात निर्वाचित धलखं लिकयाः वया थासाय् पुजा बास्तोलायात तःगु खःसा जनजाति क्लस्टरय् त्याःम्ह कृष्णमान श्रेष्ठयात चिइकाः ध्रुव थापामगर यात निर्वाचित घोषणा याःगु खः ।
थ्व संशोधनयात कयाः सोम शर्मा व कृष्णमान श्रेष्ठं केन्द्रीय निर्वाचन आयोगय् उजुरी तःगु खः । थ्व उजुरी छलफल लिपा सोम शर्माया थासय् नां दुथ्याकूम्ह पुजा बास्तोलायात शपथ ग्रहण मयाकल, अले वयां लिउ लानाच्वंम्ह विष्णुमाया गुरुङयात नं शपथ ग्रहण मयाकू । तर कृष्णमानया थासय् हःम्ह ध्रुव थापामगरयात धाःसा शपथ ग्रहण याकल ।
कृष्णमान जनजाति क्लस्टरं त्याःम्ह खः । त्याःगु घोषणा जुइधुंकाः सकसिया पाखें बधाइ फयेधुंकूम्ह वय्कःया नां निन्हु लिपा निर्वाचित धलखं लिकयाबिउगु खः । कृष्णमानया थासय् नां दुथ्याकूम्ह ध्रुवथापामगरयात मत वय्कःया स्वयां अप्वः वःगु खः, तर ध्रुवं उबलय् खुल्लाय् निर्वाचन याःगुलिं पराजित जुल । खुल्लाय् निर्वाचित मजुइवं कृष्णमानया नां लिकयाः ध्रुवया नां दुथ्याकूगु खः ।
कृष्णमानं थःगु नां चिकूगु खँय् असन्तुष्ट प्वंकुसें थःत अन्याय जूगु खँ धयादीगु दु । वय्कलं धयादिल, ‘जि छम्ह नेवाःया काय्मचा, अले जितः छुं लफडा यायेमवः, तर पार्टी दुने थः मनूयात मुलय् तया जुइगु व योगदान बिउपिंत तापाकेगु ज्यां जितः विक्षिप्त यानाबिउगु दु ।’
आयोगं १२ गतेया मिति तयाः १५ गते जक थःगु नां चिइकूगु दावी कृष्णमानया दु । वय्कलं थः त्याःगुलिं छेँजःपिं पासापिं सकलें लय्ताया च्वंगु व सकसिनं बधाइ बीधुंकूगु अवस्थाय् थःगु नां चीकूबलय् आः थः छु ख्वाः ज्वनाः छेँय् लिहां वनेगु धकाः धयादीगु दु ।
थःत समानुपातिक सांसद ल्ययेगु इलय् नं धोका बिउगु दावी वय्कःया दु । समानुपातिक सांसद ल्ययेत पार्टी दुने जूगु प्रिइलेक्सनय् थःत ५ हजार स्वयां अप्वः मत वःगु, तर २–३ हजार मत वःपिं सांसद जूसां थःत सांसद मदयेकूगु खँ वय्कलं धयादीगु दु ।
LEAVE YOUR COMMENTS