मुखां नयाया फाइदा

मुखां पोषक तत्व यक्व दुगु जलीय उत्पाद खः । मखांयात चाकुमरि, चिसवाः वःगु मरि, खीर आदि दयेकेत छ्यलेगु याः । मुखांयागु खीर तसकं हे साः । स्वास्थ्यया निंतिं नं थ्व साप हे निं । अथे जुयाः हे खइ, झी म्वसिप्वः चिनीबलय् मुखां छता नं त्वःमफीक तयेगु याइ । मुखां नयेगु बानि यानाच्वन धाःसां थुकिं झीत गुलिखे ल्वय् जुइ मफयेकातइ ।उकिं थुकिया फाइदा सिल धाःसा छिं नं अवश्य हे भपादी जुइ ।

मुखांया गुण
मुखांलय् ९.७ प्रतिशत याउँक पचे जुइगु प्रोटीन, ७६ प्रतिशत कार्बोहाइड्रेट,१२.८ प्रतिशत लः, ०.१ प्रतिशत चिल्लो ०.५ प्रतिशत मिनरल लवण, ०.९ प्रतिशत फस्फोरस व १.४ मिलीग्राम आयरन पदार्थ दइ । थुकी वासःया गुण नं दइ । लिसें मुखांलय् क्याल्सियम, एसिड व भिटामिन बी नं दइ ।

पाचन बल्लाकी
मुखां छताजि एन्टि अक्सिडेन्ट, कुगाक्क दुगु चीज जुयाः दक्वं आयुवर्गयापिं मनूतय्सं अःपुक हे पचय् यायेफु । मचांनिसें बुरां तकं थ्व अःपुक हे पचय् याइ । थथे पचय् याये अःपुगु जुयाः हे थुकियात सुपाच्य धाइगु खः । मुखांलय् एस्ट्रीजन गुण नं दइ, गुकिं यानाः छ्वालुक झारा जुयाच्वंसा दिनावनी । लिसें नयेपित्याइगु नं जुइका बी । मुखां भिंगु घ्यलय् सियाः नलकि छ्वाल्लुक झारा जुइगु ल्वय् लनावनी ।

एन्टि एजिंग गुण दु
मखांनं उमेरया लिच्वःयात प्रभावहीन दयेकेगु ज्या नं याः । थ्व नट्सय् एन्टिअक्सिडेन्ट प्रशस्त दइगु जुयाः उमेर लक सिस्टमया रुपय् ज्या याइ । अले छितः ताःई तक ल्याय्म्ह ल्यासे दयेकातइ । मुखांनं प्रिमेच्योर एजिंग, प्रिमेच्योर ह्वाइट हेयर, अले एजिंगया मेमेगु लक्षणया जोखिमयात कम यायेत ग्वाहालि याइ ।

डायबिटिज ल्वगियात
डायबिटिज मेटाबोलिज्मया विकार खः, गुगु हाइ सुगर लेभलया लिसें जुइ । थुकिं इन्सुलिन हार्मोनया स्राव याइगु अग्न्यासयया ज्याय् पंगः थनी । तर मुखां माकुगु व पाउँगु पु खः, अले थुकी स्टार्च व प्रोटीन दइगु जुयाः थ्व डायबिटिजया निंतिं यक्व हे बांलाः ।

किड्नी बल्लाकी
मुखां नयेगु यातकि किडनी व नुगःस्येँ बल्लाकी । मुखां चाकु मजुइगु कारणं थुकिं स्प्लीनयात डिटाक्सिफाइ यायेत, किड्नी बल्लाकेत व हिइ पोषण बीत ग्वाहालि याइ । लिसें मुखां नियमित नयेगु यानाच्वन धाःसा म्हया कमजोरी मदयावनाः म्ह तन्दुरुस्त जुइ ।
स्याःगु लंकी मुखांलय् क्याल्सियम यक्व दइ, अथे जुयाः स्याःगु विशेष यानाः आर्थटाइटिसया ल्वगितय्त थुकिया सेवनं फाइदा याइ । लिसें थुकिया सेवन यात धाःसा म्हया गुगुं नं अंगय् स्यानाच्वंगु गथेकिः जँ स्याःगु, पुलि स्याःगु आदि याकनं लनावनी ।

थुलि बाहेक नं यक्व हे ज्या वः
१) थ्व नयेबलय् प्वाः याकनं जाइ । क्यालोरी, फायट व सोडियम कम जक दइ । अथे जुयाः थ्व न्ह्यागु इलय् नं नयेजिउ । याकनं प्वाः जाइगु जुयाः नये पित्याः काचाक्क जुइमखु ।

२) ब्लड प्रेसरया समस्या दुपिंसं ला थ्व नये हे माः । थुकी कम सोडियम दइ, तर पोटासियम व म्याग्नेसियम थुकी यक्व मात्राय् दु । अथे जूगुलिं ब्लडप्रेसर समस्या दुपिंसं मुखां नयेगु यायेमाः ।

३) थुकी क्याल्सियम दइगु जूगुलिं छिगु क्वँय् व वायात फाइदा याइ ।

४) तसकं ल्ह्वनाः समस्या जुयाच्वंपिंत नं मुखां नयाया फाइदा याइ । चिल्लो दइमखु, प्वाः नं जाइ । अथे जुइबलय् नसा कम जक नयेगु जुइ, गुकिं यानाः छिगु म्हया तौल पाः जुइ ।

५) मुखांलय् गुगु प्रोटिन, कार्बोहाइड्रेट, फायट, मिनरल व फस्फोरस आदि तत्व दइगु खः, उकिं कामोत्तेजना अप्वयेकेगु ज्या याइ । लिसें शुक्राणुया क्वालिटि थकायेगुया लिसेलिसें उकिया ल्याः नं अप्वयेकाबी ।

६) मचा बूपिं मिस्त व मचा बुइ धुंकाः कमजोर जूगु वाःचायेकाच्वंपिं मिसातय्सं नं मुखां नयेगु यायेमाः ।

७) बहनी दुरुइ मुखां कुर्काः नलकि छितः बांलाक न्ह्यः वइ । थुकिं म्हया कमजोरी मदयेकेगुया लिसें तनाव नं मजुइकाबी ।

८) यदि छितः कफि त्वनेगु बानि जुल अले व बानि त्वःफिकेगु छिगु बिचाः दु धयागु खःसा मुखां नयेगु यायेमाः ।

९) मुखांलय् दुगु प्रोटिनं यानाः थ्वं मसल्स दयेकेत व फिट जुइकातयेत ग्वाहालि याइ ।

१०) मुखां नियमित नयेगु यानाच्वन धाःसा बुलुहुं बुलुहुं छिगु गिजा सम्बन्धि समस्या ज्यनावनी । थ्वं म्हुतुइ स्याइगुयात नं लंका बी ।

सावधान
मुखांनं गुलि गुलिसितं एलर्जी जुइफु । अथे जूगुलिं छिं अज्याःगु छुं लक्षण खन धाःसा डाक्टरयाके सल्हा कयादिसँ । डायबिटिजया ल्वगि, गुम्ह न्हापा हे इन्सुलिन कयाच्वने धुंकूम्ह खः, वं थ्व मुखां नये न्ह्यः डाक्टरया सल्हा कायेमाः । छाय्धाःसा थुकिं हिइ चिनिया मात्रा कम यायेगु कुतः याइ । अथेहे कब्जियत जूपिंसं नं मुखां आपाः नयेमजिउ ।

सम्बन्धित बुखँ

LEAVE YOUR COMMENTS