हृदयघात

हृदयघात अर्थात हर्ट अट्याक । न्यनेबलय् हे ग्यानापुसे च्वंगु ल्वय् । हर्ट अटाय्क जुलकि ला अप्वःसिनं मनू सीगु हे ल्वय् धकाः नालाकाइ । मखुगु खँ नं मखु, मनूत हृदयघात जुयाः सीगु, अनेकन बुखँ मिडियाय् न्यने दु। अस्पताल थ्यंके हे मलाः, अस्पताल थ्यनाः नं वासः याये मलाः, वासः यानाः नं म्वाके मफु आदि इत्यादि । अय्जुयाः हृदयघात धालकि मनूत थारा न्हू । मखुगु बुखँ नं मखु, थौंकन्हय् नेपालय् नं हृदयघातं यक्व मनूत सिनाच्वंगु दु ।

जि छम्ह थः हे डाक्टर । जितः हृदयघात जूगु जितः हे विश्वास मदयाबिल । जिं जितः हृदयघाट जूगु शंका यानासां पक्का यायेमफया बिल । हृदयघात जुयाः नं जि ला निन्हु तक अस्पतालय् मवँसे ग्यास्ट्रिक वासः नयाच्वना । डाक्टरी सफुलिइ धयातःगु दु – ल्वय् सफुलिइ च्वयातःथें सफुलिइ धयातःथें खने मदयेफु । बस् जितः अथे हे जुल । वंगु मोहनिया नवमिकुन्हु अर्थात कार्तिक २० गतेया सुथय् ३ बजे जितः प्वाः स्यात । छाति मस्याः, वाक्वाक् वल, धक्का वल । निकः तक म्ह छम्हं चःति वल । तर हृदयघातया लक्षण व चिं गथेकि छाति दथुइ स्यायेमाःगु, खवगु लप्पा स्यायेमाःगु, खवगु मन्चा स्यायेमाःगु, अथे छुं नं मजू । तसकं कमजोर जुइमाः, सने हे मफयेमाःगु, अथे छुं नं मजू । मात्र प्वाः स्यात, नुगचु स्यानाः मात्र ग्यास्ट्रिक थें जुल । हृदयघातया छगू हे जक लक्षण खः चःति नाःनाः वःगु। जितः शंका ला अवश्य जूगु खः । हानं नवमिकुन्हु बहनी छेँय् मस्तय्सं मोहनि धकाःभचा भचा अय्लाः त्वनेगु, पालुगु, पाउँगु स्नाय्क्स नयेगु यात। जिं नं भचा भचा त्वना, नया ।

अले जव कन्हय्कुन्हु ३ बजे् सुथय् तसकं प्वाः स्यात, जितः व हे अय्लाः व पालुगु, पाउँगु स्नाय्क्स लुमना वल । मति लुल, उकिं हे प्वाः स्याःगु जुइ । अले चान्हय् हे ग्यास्ट्रिकया मति लुल, उकिं हे प्वाः स्याःगु जुइ । अले चान्हय् हे ग्यास्ट्रिकया वासः नया । चान्हय् वासः न्याकेछ्वया । सुथय् जूबलय् प्वाःस्याःगु लनावन। भचा भचा खःथें मखुथें जक स्यानाच्वंगु वासः नया हे च्वना ।

दशमिकुन्हु अर्थात २१ गते आगमय् पुजासाजा याना । थकालि च्वना । सम्हय् नया, छुं मजू । प्वाः नं उलि मस्याः, तर कन्हय् कुन्हु याने २२ गते एकादशिकुन्हु हानं भचा भचा प्वाः स्यानावल । हानं भचा भचा चःति नं वयावल । अय् नं जितः पक्का हृदयघाट जूगु धकाः धायेमफु। शंका जुयाः अस्पताल वने धकाःअस्पतालय् फोन याना । अस्पतालय् इमर्जे न्सि जक चाः । डाक्टरत मदु धाल । उकुन्हु अथेहे फुनावन । छेँय् नखत्या सःतातःगु। थःथितिपिं सकलें वल । नापं च्वनाः गफ नं याना । भचा भचा प्वाः स्याः । यःयःगु मनया । छाति, ल्हाः, मंचा जितः स्या हे मस्यात । उकिं कमजोरी महसुस नं मजू । उकुन्हु नं अथेंहे बिते जुयावन ।

अन सातिकुन्हु २३ गते नं उलि प्वाः मस्याः । नयेफु, जुइफु । ग्यास्ट्रिकया वासः नयाच्वना । सुथय् क्लिनिकय् वना । ल्वगित स्वया । ल्लिहां वयाबलय् जितः तसकं कमजोर थें च्वनावल । तुति स्यात, न्यासि वने थाकुल । त्यानु थें च्वनावल । अले जितः ग्यास्ट्रिक जक मखु, हृदयघात हे जुइगु जुइ धयागु मति वन । जिगु खाइप्वःचाय् छगः ल्वहंचा नं दु। वहे स्याःगु खः ला धयाथें नं च्वनावइगु। आः ला जि हे मजिल बांलाक जाँचबुझ यायेमाल धकाः काययात ब्वनाः अस्पताल वना । अस्पतालय् जाँचबुझ जुल । जि न्हापा ज्या यानाच्वनागु हे काठमाडौं मोडेल अस्पतालय् सकतां जाँच यायेधुंकाःया लिच्वः जितः हृदयघात जूगु हे ठहरे जुल ।

अनंलि तुरुन्त हे एम्बुलेन्स तयाः शहीद गंगालाल अस्पतालय् यंकल । अन नं सकतां जाँच यात, हृदयघाट जूगु हे ठहरे यात । एन्जियोग्राम यानाः स्वयेमाःगु जुयाः भर्ना यात । एन्जियोग्राम याःबलय् जिगु नुगःचुया प्यपु हिनू छसिकथं १०० प्रतिशत, ९० प्रतिशत, ८० प्रतिशत व ६० प्रतिशत प्वाः तिनाः बन्द जुयाच्वंगु खनेदत । लिच्वः बाइपास अपरेशन यानिकि नुगःचु चायावइगु अपरेशन यायेमाः धाल । बाइपास अपरेशन याइम्ह डाक्टरं स्वःवल । खुवाः लिपा अपरेशन यायेगु, अबलय् तक वासः नयाच्वँ धकाः छेँय् छ्वयाहल । वासः नयाः नं मलं । हानं हानं छाति स्याना वइगु। स्याइबलय् नयेत धकाः बियाहःगु वासः नःसां गबलें लनी, गबलें मलं । अस्पताल हे वनेमाः, छेँजःपिंत दुःख, सास्ति ।

उकिं वैश वनेधुंकूपिं, खास यानाः पीदँ पुले धुंकूपिं सकसिनं यदि प्वाः स्यात, छाति स्यात धाःसा छकः अवश्य नं मुटु जाँच याकेमाः । जि थें लिपा लाकाः च्वने मजिउ। गुबलें गुबलें छाति स्यानाः प्वाः स्यानाः क्यंवंपिनि ग्यास्ट्रिक जक हे जूगु जुइ धकाः जाँच यायेत अल्छि चायाच्वने मजिउ। ज्यानया सवाल, सुम्क च्वने मजिउ।