वाय् क्याभिटि जुइके मबिइगु उपाय
वाय् प्वाः गनीगुयात वैज्ञानिक भाषां दन्तक्षय अथवा क्याभिटी धकाः धाइ । म्हुतुइ दइगु एसिडं यानाः वाया इनामेल फ्वाका जुयावनी, गुकिं यानाः क्याभिटिया निर्माण जुइ । म्हुतुइ दइगु ब्याक्टेरिया (लाः, नसया कण व मेमेगु पदार्थलिसें) वाया सतहय् मुनावनी, गुकियात ‘प्लक’ धकाः धाइ ।
प्लकय् दुगु ब्याक्टेरियां छिं भपादीगु नसाय् दुगु सुगर व कार्बोहाइड्रेटयात एसिडय् हिलाबी । थ्व हे एसिडं यानाः वा फ्वाका जुयावनी । लिच्वः कथं क्याभिटिया निर्माण जुइ । तर छुं छुं घरेलु उपाय छ्यलाः वायात बल्लाकेगु लिसें प्राकृतिक रुपं क्याभिटिलिसे ल्वायेफइ ।
लवं
लवं क्याभिटिया लिसेलिसें गुगुं नं कथं वालिसे सम्बन्धित समस्याया निंतिं रामबाण खः । एन्टि इन्फ्लेमेंन्टरी, एनाल्जेसिक व एन्टिब्याक्टेरियल गुणया कारणं लवनं स्याः क्वलाकेगु व क्याभिटियात पनेगु ज्या याइ । समस्या जुइबलय् १÷४ चम्चा हाम्वःचिकनय् निफुति निसें स्वफुति तक लवंचिकं ल्वाकछ्यानाः कयादिसँ, थुगु मिश्रणयात बहनी द्यने न्ह्यः कटनबलय् कयाः प्रभावित वाय् तयादिसँ ।
चि
चिइ दइगु एन्टिसेप्टिक व एन्टिबायोटिक गुणया कारणं थुकियात क्याभिटिया उपचारय् छ्यलेगु याः । थुकिं स्याःगु व मनावःगु क्वलाकेत, गुगुं नं कथंया इन्फेक्सन व म्हुतुइ ब्याक्टेरियाया वृद्धियात पनेत ग्वाहलि याइ । थुकिया निंतिं छगू चम्चा चि क्वाःलखय् ल्वाकछ्यानादिसँ, अनंलि थुगु लखं म्हुतु कुल्ला यानादिसँ ।
समस्या मज्यंतले थ्व उपाय न्हिछिया स्वक्वः याना च्वनादिसँ । थ्व बाहेक बागू चम्चा चि, तूचिकं भचा व कागतिया रस भचा तयाः पेस्ट दयेकादिसँ । थुगु पेस्टं छुं मिनेट तक गिजाय् मालिस यानादिसँ । ब्याक्टेरिया स्यायेत थुगु उपाय छुं न्हि तक न्हि निक्वः याना च्वनादिसँ ।
आयल पुलिंग
तसकं पुलांगु उपाय खः । गुगु क्याभिटीयात कम यायेगुया लिसेलिसें गिजां हि वइगु व सासः नवइगुयात पनेत नं ज्या वः । लिसें थ्व वाया समस्याया थीथी प्रकारया निंतिं जिम्मेवार, हानिकारक ब्याक्टेरियायात म्हुतुं सफा यानाछ्वयेत नं ग्वाहालि याइ । थुकिया निंतिं हाम्वःचिकं छगू चम्चा म्हुतुइ तयादिसँ ।
थ्व २० मिनेट तक म्हुतुइ हे तयातइदिसँ, तर घुतुकादी मते । अनंलि चिकं ल्ह्वयाः लुमुलुमु धाःगु लखं म्हुतु च्वलादिसँ । रोगाणुरोधी लाभ कायेत चिया लः छ्यलादिसँ । अनंलि सदां थें थःगु वाय् ब्रश यानादिसँ । थ्व उपाय न्हिं न्हिं खालि प्वाथय् यानादिसँ । थ्व उपाय नैंक्याःचिकं अथवा सूर्यमुखी चिकंलिसे नं यायेफइ ।
लाभा
एन्टिब्याक्टेरियलया लिसेलिसें एन्टिबायोटिक गुणं नं समृद्ध जुइगु कारणं लाभां वा त्वःधुलीगु व क्याभिटि जुइगु समस्या मजुइकेत ग्वाहालि याइ । थ्व स्याः क्वलाकेत व स्वस्थ गिजा व वाया निंतिं नं बांलाः । स्वभ्ये वा प्यभ्ये लाभा छ्यानाः उकी १÷४ चम्चा सिंचि वाय् इलाः १० मिनेट अथें त्वःतातयादिसँ । क्याभिटि कम यायेगु निंतिं थ्व उपाय छुं न्हि तक न्हिं निक्वः यानाच्वनादिसँ ।
हलू
आयुर्वेदय् हलूयात क्याभिटिं यानाः स्याःगु क्वलाकेत छ्यलीगु खः । थुकी दइगु एन्टिब्याक्टेरियल गुणया लिसें एन्टि इन्फ्लेमेंन्टरि गुणं गिजायात स्वस्थ यानातयेगुया लिसें ब्याक्टेरियल इन्फेक्सनं यानाः वा हाइगु समस्यायात नं पनाबी । प्रभावित वाय् हलू भतिचा इलाः छुं मिनेट त्वःता तयादिसँ । अनंलि लुमुलुमु धाःगु लखं बांलाक कुल्ला यानादिसँ ।
नीहः
नीहः नं क्याभिटिया उपचारया निंतिं छगू मेगु लोकंह्वाःगु उपाय खः । थुकिया एन्टिब्याक्टेरियल गुणं ब्याक्टेरियां यानाः जुइगु क्याभिटि मजुइकेत ग्वाहालि याइ । वाय् व गिजाय् नीहःया रस बुलादिसँ, छुं मिनेटया निंतिं त्वतादिसँ अले हानं लुमुलुमु धाःगु लखं कुल्ला यानादिसँ । थ्व उपाय न्हिं छक्वः वा निक्वः यानादिसँ । थ्व बाहेक छिं नीहःया कथियात वाय् ब्रश यायेत नं छ्यलेफु ।
अम्बः
अम्बः नं क्याभिटिया उपचार यायेत ज्या वः । थुकी भरपूर मात्राय् दुगु एन्टिअक्सिडेन्ट व भिटामिन सीया कारणं थुकिं ब्याक्टेरिया व इन्फेक्सनलिसे ल्वायेत ग्वाहालि याइ । थ्व बाहेक थुकिं म्हुतु सफा यायेत व सासः नमवयेकेत नं छितः ग्वाहालि याइ । नियमित रुपं ताजा अम्बः भपीगु अथवा बागू गिलास लखय् बागू चम्चा अम्बःचुं नियमित रुपं कयादिसँ ।
LEAVE YOUR COMMENTS