नेकपायात वःगु अवसर व हाथ्या

तत्कालिन एमाले व माओवादी केन्द्र एकता जुयाः नेपाल कम्युनिष्ट पार्टी (नेकपा) दयेके धुंकाः नेपाःया राजनीतिइ विकास निर्माण यायेगु खःसा, देय्यात समृद्धिइ यंकेगु अले ज्या यायेगु खःसा दकलय् बांलाःगु अवसर वःगु दु । नेकपाया नेता कार्यकर्तात जक मखु स्वयं प्रमुख प्रतिपक्षी दल नेपाली कांग्रेसया नेता कार्यकर्तातय्सं तकं देय् विकासया निंतिं आःया राजनीतिक अवसर धइगु तःधंगु अवसर खः धकाः धायेगु याना हयाच्वंगु दु ।

नेपाली कांग्रेस दुने नं कांग्रेस प्रतिपक्षी थें हे जुयाच्वंगु मदु धकाः तकं धायेगु यानाच्वंगु धइगु हे नेकपायात थ्व इलय् प्रतिपक्षी दलं संसदय् तकं प्रतिपक्षीया रुपय् भूमिका म्हितेगु ज्या यानाच्वंगु मदु धइगु अर्थय् खः । कांग्रेसया भूमिका प्रतिपक्षया थें खने मदुगुया कारण धइगु संघीय संसदय् नेकपाया पक्षय् स्पष्ट बहुमत दुगु अले संघीय समाजवादी फोरम नेपाल नं सरकारय् वने धुंकाः ला झन दुई तिहाइ हे बहुमत दुगु अवस्था खः ।

न धाःसां नं थःगु ज्या निरन्तर रुपं न्ह्याके फइगु अवस्थाय् केपी शर्मा ओलीया सरकार थ्यंगु खः । ओली सरकारं आःया अवस्थाय् बांलाःगु ज्या याये फत धाःसा अले जनताया चाहना कथं ज्या याना वने फत धाःसा अवश्य नं नेकपा मेगु चुनावय् नं त्याइगु अले ताः ई तक सत्ता संचालन याये फइगु अवस्था खः ।

थ्व खँ पार्टीया नेता कर्याकर्तातय्सं तकं धायेगु याना वयाच्वंगु दु । थ्व छगू कथं नेकपाया नितिं अर्थात ओली सरकारया नितिं तःधंगु अवसर खः । नेपाःया राजनीतिइ स्वल धाःसा अप्वः सरकार बहुमत मदयाः समस्या जुल । उकिं यानाः सांसदत न्यायेगु कासा तकं जुल । राजनीतिक दलत कुचा कुचा तकं जुल । उकिं नेपाःया राजनीतिइ स्थिर सरकार धइगु नं छगू नारा हे जक जुया बिल ।

नेपाःया राजनीतिइ स्थिर सरकार धइगु नं छगू नारा हे जक जुया बिल । आः मेगु चुनाव तकया नितिं थःपिनिगु आन्तरिक समस्या मवल धाःसा नेकपाया हे सरकार जुइगु निश्चित जूगु दु । उकिं थ्व ओली सरकारया नितिं तःधंगु अवसर अर्थात ह्वःताः खः ।

आः मेगु चुनाव तकया नितिं थःपिनिगु आन्तरिक समस्या मवल धाःसा नेकपाया हे सरकार जुइगु निश्चित जूगु दु । उकिं थ्व ओली सरकारया नितिं तःधंगु अवसर अर्थात ह्वःताः खः । देय् व जनताया नितिं ज्या यायेगु खत धाःसा नेपाःया राजनीतिक इतिहासय् दकलय् तःधंगु अवसरया रुपय् वयाच्वंगु दु धकाः तकं धायेछिं ।

दुई तिहाइ बहुमतया सरकार दुगु अले न्हय्गुलिं प्रदेशय् थ्वहे गठबन्धनया सरकार दुगु अवस्था धइगु थ्व न्हापांखुसी हे खः । केन्द्रंनिसें प्रदेश अले स्थानीय सरकार तकं सत्तापक्षया स्पष्ट बहुमत दुगु अवस्था धइगु ज्या यायेगु नितिं तःधंगु ह्वःताः खः । थ्व अवसरयात गुलित सदुपयोग याना वने फइगु खः ? देय् व जनताया नितिं गुलि ज्या याइगु खः ? थ्व खँय् आम जनतां चिउताः तयाच्वंगु दु ।

विपक्ष वा प्रतिपक्षं छुं नं कथंया पंगः मथंसां नेकपा दुने धाःसा समस्या ब्वलना वइगु संकेत खने दयावःगु दु । संघीय संसदय् बजेटया बारे सत्तापक्षया हे सांसदं मन्त्रीयात जेलय् कुनेमाः धाःगुनिसें प्रदेशया संसदय् तकं विरोध जूगु धइगु हे पार्टी दुने समस्या तच्वया वःगुया संकेत खः । प्रशंग नम्बर १) संघीय संसदय् बजेटयात कयाः प्रतिपक्ष सिबें नं सत्तापक्ष नेकपाया हे सांसदत कडा रुपं प्रस्तुत जुयादीगु खः ।

मन्त्रीयात जेलय् कुनेमाः धकाः तकं धायेत लिफः मस्वल । प्रतिपक्ष सिबें नं आक्रमक रुपं प्रस्तुत जुयादिल । प्रशंग नम्बर २) गृहमन्त्री रामबहादुर थापा व भौतिक पूर्वाधार तथा यातायात मन्त्री रघुवीर महासेठया दथुइ कचमच जूगु खँ पिहां वःगु दु । ज्या मयाइगु निर्माण व्यवसायीतय्त ज्वनाः कुनेगु धकाः गृह मन्त्री धायेवं मेखे भौतिक पूर्वाधार तया यातायात मन्त्री महासेठं सुना नं घरपकड यात धाःसा थःत कनेत इनाप यानादीगु दु ।

वय्कलं निर्माण व्यवसायीयात सुनां नं घरपकड याइ मखु धकाः तकं स्पष्ट यानादीगु दु । गृहमन्त्रीया आदेश कथं जिल्ला जिल्लाय् प्रमुख जिल्ला अधिकारीतपाखें निर्माण व्यवसायीयात ज्वनाः सार्वजनिक मुद्दा चले यायेवं भौतिक पूर्वाधार तथा यातायात मन्त्री महासेठं गृहमन्त्रीया उगु पलाःयात कयाः आपत्ति प्वंकेगु ज्या यानादीगु खः ।

प्रशंग नम्बर ३) राजधानी तकं लानाच्वंगु महत्वपूर्णगु ३ नम्बर प्रदेशया संसदय् तकं बजेटयात कयाः सत्तापक्षया हे सांसद आक्रमक रुपं प्रस्तूत जुयादीगु दु । विपक्षतय्सं विरोध यायेम्वायेक सत्तापक्षया हे सांसदतय्सं प्रादेशिक सरकारया मन्त्रीतय्त लाक्वपाक्व धायेगु यानाहःगु दु । प्रशंग नम्बर ४) नेकपाया सांसदत व कार्यकर्तात ब्यागलं ब्यागलं मत तयाः प्रदेशया नांया सवालय् वनाच्वंगु दु ।

३ नम्बर प्रदेशया नांया सवालय् तत्कालिन एमालेपाखें प्रदेशय् प्रतिनिधित्व यानादीपिं सांसदत उगु प्रदेशया नां नेपालमण्डल तयेमाः धकाः सार्वजनिक रुपं न्ववानाः न्ह्याः वनाच्वंगु दुसा उखे एमाले व माओवादी केन्द्रया हे नेवाः व तामाङ भातृ संगठनत नेवाः ताम्सालिङ प्रदेश नां तयेमाः धकाः अभियानय् न्ह्याः वनाच्वंगु दु ।

थुकथं स्वया वन धाःसा नेकपा दुने आन्तरिक रुपं समस्या तच्वया वयाच्वंगु अले नेता कार्यकर्तात झन झन असन्तुष्ट जुया वःगु संकेत बीगु कथंया यक्व खँ दयेफु । तत्कालया नितिं धायेगु खःसा केन्द्रीय सांसदतय्त ला प्रधानमन्त्री नापं अध्यक्ष ओलीं तप्यंक हे निर्देशन बियाः म्हुतुप्वाः तिका बिउगु खनेदु । अथे हे आः प्रदेशया सांसदतय्त नं निर्देशन बीगु नापं म्हुतुप्वाः तिकेगु ज्या प्रधानमन्त्री नापं पार्टीया अध्यक्ष ओलीं यानादी जुइमाः ।

अथे म्हुतुप्वाः तिकेगु ज्या गबले तक प्रधानन्त्री ओलीं यानादी ? पार्टीया आन्तरिक समस्या झन झन तच्वया वयाच्वंगु अले एकता महाधिवेशन लिपा ला झन अप्वः समस्या वयेफु । म्हिगःया दिनय् एमाले व माओवादीया नेता कार्यकर्ताया दथुइ छम्हेस्यां मेम्हेसित शत्रुया भावना कयाच्वंगु अवस्था खःसा आः तक नं कयौं स्थानीय थासय् ला तत्कालिन एमाले व माओवादी केन्द्रया नेता कार्यकर्ताया दथुइ मिले जुयाः नापं ज्या यायेगु वातावरण तकं मदुनि ।

थ्व धइगु कन्हय् वनाः नेकपा दुने चिचीधंगु गुटया दथुइ ततःधंगु निगू गुट निर्माण जुइगु अवस्था खः । थुकथं स्वल धाःसा नेकपाया नितिं आः मूल रुपं मेपिंसं पंगः थनीगु सिबें नं आन्तरिक समस्या हे तःधंगु जुया वइगु अवस्था दु । उकिं आः नेकपायात हाथ्या धइगु हे पार्टीया नेता कार्यकर्तायात गुकथं मिले याना यंकेगु नापं छगू हे थासय् तयाः ज्या याकेगु धइगु खः । थ्व हाथ्यायात पार्टीया निम्ह अध्यक्ष केपी शर्मा ओली व पुष्पकमल दाहालं गुकथं ज्यंका वनीगु खः व धाःसा स्वये ल्यं हे दनि ।