शिक्षा विधेयकय् मांभाय् मदु
येँ (नेपालभाषा टाइम्स)÷सरकारं हःगु शिक्षा सम्बन्धी न्हूगु विधेयकयात शिक्षक संगठन व निजी विद्यालयतय्सं आलोचना यानाहः थें नेवाः शिक्षाविद्तय्सं आलोचना याना हःगु दु । खास यानाः विधेयकय् मातृभाषा शिक्षायात महत्व बिया मतःगु खँय् शिक्षाविद्तय्सं आलोचना यासें उकियात संशोधन याये माःगु समेत माग याना हःगु दु ।
मातृभाषा शिक्षाया बारे सक्रिय जुया च्वनादीम्ह भाषिक न्ह्यलुवा बिष्णु चित्रकारं थ्व शिक्षा विधेयकय् मांभासं शिक्षा सिबें नं संस्कृत शिक्षायात अनावश्यक रुपं महत्व बियातःगु खँ कनादीगु दु । थ्व विधेयक विशेष यानाः तगिं ९ निसें १२ तकया शिक्षायात ध्यान बियाः दयेकातःगु खः । थ्व तगिमय् मांभासं शिक्षा कायेगु व्यवस्था याना तःसां उकियात वैकल्पिक विषयया रुपय् जक तयातःगु जुयाः थ्व बुँदा संशोधन यायेमाःगु खँ वय्कलं कनादिल ।
मांभासं शिक्षाया खँयात ‘नेपाली भासं वा मांभासं’ काये फइ धकाः तयातःगु जुयाः थ्व बुँदा खारेज जुइमाःगु माग वय्कलं यानादिल ।
अथे हे उपप्रा. मदनसेन वज्राचार्यं नं शिक्षा कायेगु विषययात नेपाली वा मांभासं धकाः तयातःगु जुयाः थुकी विद्यार्थीत मांभाय्या शिक्षाय् वनीगु सम्भावना कम जक दुगु खँ कनादिल ।
वंगु शनिवाः शिक्षा विधेयकयात कयाः बिष्णु चित्रकारया हे पहलय् छगू सहलह मुँज्या नं जूगु खः । मुँज्यां शिक्षा विधेयकय् मांभासं अनिवार्य शिक्षा बीगु व्यवस्था यायेमाः धइगु बुँदा थपे यानाः सरकारयात ज्ञापनपत्र बीगु धकाः निर्णय याःगु खः । मुँज्याय् ब्वति कयादीम्ह डा. महेशमान श्रेष्ठं शिक्षा विधेयकयात कयाः मेमेगु जनजातितय्सं नं छुं बिचाः यानाच्वंगु दयेफु धासें आः तत्काल समुदायलिसे सहलह यानाः थुकिया बारेमंकाः कथं पलाः न्ह्याका वनेगु खँ नं कनादिल ।
शिक्षा विधेयकं थौंकन्हय् थीथी स्कुलय् नेपालभाषां स्थानीय विषय ब्वंकेगु यानाच्वंगु सवालयात धाःसा खास हे मथीगु खँ धाःगुु दु । स्थानीय विषययात प्रदेश सरकारया कानुनं सम्बोधन याइ ।
नेवाः ख्यलं तःगु माग गन वन ?
देय्यात समावेशीकरण यायेगु मू मुद्दा ज्वनातःगु संविधान जारी जुइधुंकाः तयार याःगु शिक्षा विधेयकं शिक्षाय् समावेशीकरणयात धाःसा खास हे ध्यान मबिउगु गुनासो याना हःगु दु ।
शिक्षा मन्त्रीया रुपय् जनजाति खेमायाम्ह अशोक राई नियुक्त जुयादीवं नेवाः ख्यलय् वय्कःयात नापलानाः स्कुलया ९ व १० तगिमय् थःथःगु मांभाय् ब्वने दइगु व्यवस्था याना बी माल धकाः इनाप याःगु खः । उकिया लागिं वय्कःयात नापलानाः ज्ञापनपौ नं बीगु ज्या जूगु खः ।
तर मन्त्रालयपाखें थ्व विषययात सम्बोधन मयाःगु जक मखु मांभासं शिक्षाया छुं खँ हे दुमथ्याःगु शिक्षा विधेयक तयार याःगुलिं भाषिक आन्दोलनया न्ह्यलुवात निराश जूगु दु । शिक्षा विधेयक मन्त्रीयात समेत गुमराहय् तयाः मन्त्रालयया कर्मचारीतय्सं थः यत्थे दयेकूगु खनेदु धकाः अनुमान यानाहःगु दु ।
LEAVE YOUR COMMENTS