अवशेषया लिधंसाय् ऐतिहासिक देगः पुनःनिर्माण

यल(नेपालभाषा टाइम्स)- विश्व सम्पदाया धलखय् लानाच्वंगु यल लायकूया आपालं देगः व सम्पदात पुनःनिर्माण जुइधुंकूगु दु । मेखे गुलिखे सम्पदा पुनःनिर्माणया क्रमय् दु । थ्व हे झ्वलय् यल लायकू लागाया पूर्वपाखे च्वंगु छगः देगः धाःसा अवशेषया लिधंसाय् पुनःनिर्माण शुरु याःगु दु । अवशेष जक ल्यनाच्वंगु यल लाय्कू लागाया पूर्वपाखे च्वंगु नरनारायण द्यःया देगः व हे अवशेषया लिधंसाय् पुनःनिर्माण शुरु याःगु खः ।

यल महानगरपालिका वडा नं. ६ लय् लाःगु अवशेष जक ल्यं दुगु उगु देगः नेपाल संवत् ७३५य् निर्माण जूगु देगःया ल्वहंपौपाखें सीदुगु दु । ६ वडाया लँुहितिस्थित नुगः त्वालय् सलंसः दँ न्ह्यः अस्तित्वय् दुगु तर थौं दुनाः, म्हासे जुयाः, अतिक्रमण आदिया कारणं अवेशषया रुपय् ल्यनाच्वंगु आपालं सम्पदा अझं आपालं दनि ।

नुगः त्वाः तदर्थ समितिया संयोजक राजीव श्रेष्ठं नरनारायणया देगःयात अवशेषयु आधारय् पुनःनिर्माण न्ह्याकागु जानकारी बियादीगु दु । ‘लुँहिति लागाय् खुगु पुरातात्विक महत्वया सम्पदाया अवशेष अझं ल्यनाच्वंगु दु । थुपिं सम्भवतः १९९० सालया भुखाचं दुनाः क्षति जूगु खयेमाः’, वय्कलं धयादिल, ‘अज्याःगु अवशेषयात इलय् पुनःनिर्माण यायेगुपाखे सरकारं ध्यान मबिउगुलिं सम्पदा अतिक्रमण यानाः निजी भौतिक संरचना निर्माण यायेगु ज्या जुयाच्वंगु दु ।

नरनारायणया देगःया अवशेष अध्ययन यानाः नक्सा पास याःगु इलय् देगःया जाः ८ फिट क्वथ्यंक थ्यंगुलिं देगःया जाः ३२ फिट दयेमाः धइगु अनुमान याःगु दु । देगः पुनःनिर्माणया निंतिं थःपिंसं पुरातत्व विभागयाके प्राविधिक ग्वाहालि फ्वनागु तर, विभागं ग्वाहालि मयाःगु धासें समितिया संयोजक श्रेष्ठं दुःख प्वंकादिल । देगः पुनःनिर्माणया निंतिं नक्सा जक तयार यायेत ११ लाया ई काःगु वय्कःया धापू दु ।

वि.सं. २०७४ सालय् स्थानीय तहया निर्वाचनय् वडा सदस्यय् निर्वाचित जुयादीम्ह वय्कलं अवशेष जक ल्यं दगुु पुरातात्विक महत्वया सम्पदा पुनःनिर्माण यायेत व उकिया बचे यायेगु इच्छा जूगुलिं यल महानगरया आर्थिक ग्वाहालिइ पुनःनिर्माणया निंतिं न्ह्यचिलागु वय्कलं कनादिल ।

अवेशषया लिधंसाय् पुनःनिर्माण शुरु याःगु नरनारायण देगःया लिक्कच्वंगु प्वाःस्याः फल्चा नं भुखाचं क्षति जूगु खः । उगु फल्चा भुखाचं क्षति जूगु च्यादँ लिपा पुनःनिर्माण जुयाच्वंगु दुसा आः अन्तिम चरणय् थ्यनाच्वंगु दु । नेवाः समुदायया मौलिक व परम्परागत नेवाः पहया प्वाःस्याः फल्चा छेँ २०७२ सालया भुखाचं क्षति जूगु खः । थुगु प्वाःस्याः फल्चा छेँ विशेष यानाः स्थानीय नेवाः समुदायया सार्वजनिक ज्याझ्वः यायेगु थाय् खः ।

थनया लुँहिति लागाय् आपालं ऐतिहासिक, पुरातात्विक, सांस्कृतिक महत्वया सम्पदाया अवशेषत ल्यनाच्वंगु व उकियात पुनःनिर्माणय् चिउताः मक्यंगुलिं अवशेष तकं लोप जुइगु अवस्थाय् थ्यनेधुंकूगु स्थानीय ७० दँया राधेश्याम प्रजापतिं कनादिल ।