कालिमाटी-बौद्ध केबुलकारया सम्भावना अध्ययन क्वचाल

येँ – थनया कालिमाटींनिसें रत्नपार्क जुयाः बौद्ध तक चले जुइगु केबुलकारया सम्भाव्यता अध्ययन क्वचाःगु दु । फ्रान्सया आर्थिक ग्वाहालिइ एमडीपी कन्सल्टिङ एन्ड इञ्जिनीयरिङ व सिस्ट्रां मंकाः कथं थ्व अध्ययन याःगु खः । अध्ययनया निंतिं फ्रान्सं ३ करोड तका खर्च याःगु खः ।

न्हय्गू किलोमिटर ताःहाकःगु थ्व केबुलकार निर्माण यायेत १५ अर्ब तुइगु अनुमान दु । उगु दूरी यात्रा यायेत ४० तका शुल्क तुइगु खँ नं अध्ययनय् न्ह्यथनातःगु दु । बौद्धं न्ह्याइगु केबुलकार चाबही, गौशाला, डिल्लीबजाः, रत्नपार्क, न्हूसतक, बसन्तपुर जुयाः कालिमाटी तक वइ । केबुलकारया गति प्रति सेकेन्ड न्यागू मिटर जुइ । केबुलकारया स्टेशन बौद्ध, गौशाला, डिल्लीबजाः, रत्नपार्क, न्हूसतक, बसन्तपुर व कालिमाटीइ दइ ।

१५८ गः डब्बा तइगु केबुलकारया प्रत्येक डब्बाय् १० निसें १२ म्ह यात्रु च्वने फइ । प्रतिवेदनय् रत्नपार्क जुयाः पूच्व, जावलख्यः, लगंख्यः व सातदोबाटोय् मेगु रुटया नं सम्भाव्यता अध्ययन क्वचायेधुंकूगु खँ न्ह्यथनातःगु दु । उकथं हे रत्नपार्क, लैनचौर, ग्वंगःबुँ जुयाः न्हूगु बसपार्क तक वनीगु स्वंगूगु रुटया नं पहिचान यायेधुंकूगु दु ।

सम्भाव्यता अध्ययन क्वचायेधुंकाः डीपीआर व केबुलकार दयेकेगु निंतिं पीपीपी मोडल प्रस्ताव यानातःगु दु । थुकिया लागिं सरकार, निजी क्षेत्र, जाइका, एडीबी थेंज्याःगु संस्थापाखें नं आर्थिक ग्वाहालि काये फइ धाःगु दु ।

दयेकेगु शुरु जूगु निदँया दुने सञ्चालन याये फइगु खँ नं सम्भाव्यता अध्ययन प्रतिवेदनय् न्ह्यथनातःगु दु । स्वनिगलय् मेट्रो रेल व मोनो रेल सम्भव मदुगुलिं केबुलकार हे बांलाःगु विकल्पया रुपय् दुगु खँ नं प्रतिवेदनय् न्ह्यथनातःगु दु ।