गुगल अनुवादय् नेपालभाषा

येँ (नेपालभाषा टाइम्स)- म्हिगःनिसें नेपालभाषा नं गुगल ट्रान्स्लेटय् दुहां वंगु दु । नेपालभाषा नं गुगल ट्रान्सलेटय् दुहां वंगु कारणं यानाः नेपालभाषां च्वयातःगु छुं नं कथंया सामग्री गुगल मार्फत हलिंया १०० गू स्वयां अप्वः भाषाय् अनुवाद याये फइगु जूगु दु । भाषाह्यमितय्सं गुगल ट्रान्सलेटय् नेपालभाषा नं दुहां वंगु थ्व न्हियात नेपालभाषाया लागिं ऐतिहासिक घटना धकाः च्वछाःगु दु ।

गुगल कम्पनीपाखें म्हिगः विश्वय् ल्हाइगु थीथी ११० गू भाषायात छक्वलं गुगल ट्रान्सलेटय् दुथ्याकूगु खःसा उकी मध्ये छगू नेपालभाषा नं लाःवंगु खः । गुगल ट्रान्सलेसनय् नेपालभाषायात नं दुथ्याकेगु लागिं हलिं नेवाः दबू (वल्र्ड नेवाः अर्गनाइजेसन) पाखें वंगु तःदँ न्ह्यवंनिसें कुतः याना वयाच्वंगु खः । थुकिया लागिं हलिं नेवाः दबूया पहलय् नेपाः लिसें विश्वया थीथी देशय् च्वंपिं नेवाःतय्सं तःदँ तक हे नेपालभाषाया थीथी खँपुयात अंग्रेजीं अनुवाद यानाः जायेकेगु ज्या याना वयाच्वंगु खः ।

हलिं नेवाः दबूया नायः संयुक्त श्रेष्ठं म्हिगः छगू वक्तव्य पित बिसें गुगल ट्रान्सलेटय् नेपालभाषा नं समावेश जूगुलिं लसता प्वंकादीगु दु । वय्कलं म्हिगः अंग्रेजी भासं च्वयातःगु दबूया वक्तव्ययात गुगल ट्रान्सलेशनपाखें नेपालभाषां अनुवाद यानाः वक्तव्यया रुपय् सार्वजनिक यानादीगु खः ।

श्रेष्ठं कनादी कथं आः नेपालभाषां न्ववाःगु खँयात मेगु भासं अनुवाद यानाः न्यने फइगु एप्स नं दयेके फइगु जूगु दु । अर्थात् थ्व ट्रान्सलेसनया ग्वाहालि कयाः आः छथासं फ्रेञ्च भासं न्ववानाच्वन धाःसा वहे खँ मेगु थासं नेपालभाषां न्यने फइगु एप्स दयेकाः न्ह्याः वने फइ ।

नायः श्रेष्ठं कनादीकथं आः जुयाच्वंगु अनुवाद शतप्रतिशत पाय्छि मजू । आः थुकियात निरन्तर सुधार यानाः फयांफछि अप्वः ‘एक्युरेशी’ हयेगु ज्या जुइ । संसारया मेमेगु भाषाया अनुवाद नं पूर्ण रुपं शुद्ध जूगु मदुनि । गुगलपाखें म्हिगः नेपालभाषायात नं गुगल ट्रान्सलेटय् तयेधुंकाःलि हलिंया थीथी थासय् च्वंपिं नेवाःतय्सं थीथी भासं खँपु च्वयाः नेपालभाषां अनुवाद यानाः स्वयेगु ज्या याःगु खः । थुकिया लागिं हलिं नेवाः दबूया गुगल ट्रान्सलेसन पुचःयात यक्वस्यां सुभाय् बियाहःगु दु ।

नेपालभाषा कि नेवारीया विवाद

गुगल ट्रान्सलेसनय् नेवाः भाय्यात ‘नेपालभाषा (नेवारी)’ धकाः च्वयातःगु खँय् धाःसा नेवाः बुद्धिजीवीतय्सं चिउताः प्वंकूगु दु । नेपालभाषायात ‘नेवारी’ धाये मजिउ धकाः अभियान हे न्ह्यानाच्वंगु दयेक दयेकं गुगलय् ‘नेवारी’ खँग्वः घाका हयेगु खँय् वय्कःपिंसं चिउताः प्वंकादीगु खः । हलिं नेवाः दबुलिं धाःसा गुगलं छ्यःगु ‘नेवारी’ खँग्वःयात चीकेगु लागिं कुतः यानाच्वनागु खँ धाःगु दु । नेपालभाषायात हेपे यायेगु ल्याखं ‘नेवारी’ धायेगु याना हःगु कारणं थ्व खँग्वः स्वीकार्य मजुइगु खँ धाःगु दु । नेपाःया लागिं माइक्रोशफ्टया प्रमुख एलेन बैलोचन तुलाधरं अन्तर्राष्ट्रिय मापदण्ड सम्बन्धी संस्था ‘आईएसओ’ लय् नेपालभाषायात ‘नेवारी’ धकाः दुथ्याका तयेधुंकूगु कारणं गुगलं नं ‘नेवारी’ छ्यःगु खः । आईएसओलिसे पत्राचार यानाः थुकियात संशोधन याके फइगु खँ वय्कलं कनादीगु दु ।