विमानस्थलया धावनमार्ग तब्या यायेगु ज्या निदँ लिहां वनीगु

येँ – नेपाःया छगू जक अन्तर्राष्ट्रिय विमानस्थलया त्रिभुवन विमानस्थलया धावनमार्ग तब्या यायेगु ज्या अझं निदँ लिज्यां वनीगु जूगु दु । धावनमार्ग तब्या यायेगु ज्याया निंतिं सम्झौता याःगु ठेकेदार कम्पनीं ठेक्का काःगु दछि पूवनेत्यंगु इलय् तक नं स्वापू तकं तःमवःलिं आः उगु ठेक्का प्रक्रिया रद्द यायेत्यंगु दु ।

पुलांगु ठेक्का रद्द यानाः न्हूगु प्रक्रिया कथं हाकनं ठेक्का बियाः ज्या न्ह्याकेबलय् ई काइगु खँ नेपाल नागरिक उड्डयन प्राधिकरणया अधिकारीतय्सं धाःगु दु । थ्वयां न्ह्यव नं स्पेनया छगू कम्पनीं ठेक्का काःगु ज्या मयाःगुलिं स्वदँ तक लिबायेधुंकूगु खः । थ्व पालय् चीनया सांघाइ कन्स्ट्रक्सन कम्पनीं ठेक्का कयातःगु खःसा उपिं नं गुला न्ह्यः सम्झौता यायेधुंकाः आःतक सम्पर्कय् मवःगु खँ उड्डयन प्राधिकरणं धाःगु दु ।

तःक्वः हे ताकेता यानाः नं सम्पर्कय् मवःगुलिं ठेक्का त्वाःथलेमाःगु खँ धाःगु दु । प्राधिकरणया उपमहानिर्देशक राजन पोखरेलं धयादिल, ‘तःक्वः हे ताकेता यानाः नं लिसः मवःगुलिं जिमिसं ठेकेदार कम्पनीयात ख्याच्वः पौ बियागु दु । आः जिपिं थ्व ठेक्का त्वाःथलाः मेगु ठेक्का प्रक्रियाय् न्ह्याः वनेत्यनागु दु ।’

थ्वयां न्ह्यव स्पेनया सानहोसे कन्स्ट्रक्टोरां नं थथे हे ज्या मयाःगुलिं ठेक्का त्वाःथलाः आःया चिनियाँ कम्पनीयात ठेक्का बिउगु खः । आः ठेक्का त्वाःल्हानाः कम्पनीयाके क्षतिपूर्ति नं पुइकेगु खँ धासें उपमहानिर्देशक पाखरेलं न्हूगु ठेक्का वनेत हे प्यला न्याला ई काइतिनिगु खँ धयादिल । थ्व हे कारणं धावनमार्ग तब्या यायेत अझं निदँ ई काइगु खनेदुगु खँ वय्कलं धयादीगु दु ।