‘खाडी दुपिं मिसा ज्यामिया अध्ययन या’

येँ – प्रतिनिधिसभा अन्तर्गतया उद्योग वाणिज्य तथा श्रम समितिं विदेशय् दुपिं कानुनी व गैरकानुनी घरेलु ज्यामि ल्याः पत्ता लगे यायेत निर्देशन बिउगु दु । समितिया म्हिगः च्वंगु बैठकय् सभापति विमल श्रीवास्तवं सरकारयात उगु निर्देशन बिउगु खः । बैठकय् श्रम, रोजगार तथा सामाजिक सुरक्षामन्त्री गोकर्ण विष्टं ब्वति कयादीगु खः ।

बैठकय् समितिया दुजःपिंसं खाडी मुलुकं छुट्टीइ वःपिं घरेलु मिसापिंत लिहां वनेगु अनुमति बीमाःगु खँ धाःगु दु । तर मन्त्री विष्टं खाडी मुलुकय् घरेलु ज्यामि पना तयागु इलय् छुट्टीइ वःपिंत हाकनं छ्वये मफइगु खँ धयादीगु दु । मन्त्री विष्टं गुगुं नं हालतय् खाडी मुलुकय् मिसापिंत घरेलु ज्यामि कथं छ्वये मफइगु अडान कयादीगु खः ।

थ्व खँयात कयाः सांसद व मन्त्री विष्टया दथुइ चर्काचर्की तकं जूगु खः ।
सरकारं खाडीइ घरेलु ज्यामि कथं वंपिं मिसापिं श्रम शोषण जक मखु यौन शोषणय् लानाच्वंगुलिं मिसापिंत घरेलु ज्यामि कथं वनेगु ज्या पनाबिउगु खः । सरकारं २०७३ साल लिपा खाडीइ मिसापिंत वनेत बन्देज तःगु खः ।