नां सार्वजनिक यायेवं करदाता सम्पर्कय् छगूत्या करोड असुल
येँ – महानगरपालिकां छेँबुँ, सम्पत्ति, व्यवसाय कर मपूपिं करदाताया नां सार्वजनिक याःपिंमध्ये अप्वःथें सम्पर्कय् वःगु दु । सम्पर्कय् वःपिं करदातामध्ये गुलिसिनं न्हापांगु किस्ताया कर बुझे याःगु दुसा गुलिसिनं धाःसा विवरण पेश याःगु दु ।
येँ महानगरपालिका राजस्व विभागयाकथं सम्पर्कय् वःगु प्यंगू व्यापारिक प्रतिष्ठानं न्हापांगु चरणय् राजस्व नं बुझे याःगु दु । थुपिं प्यंगू व्यापारिक प्रतिष्ठानं महानगरयात बुझे यायेमाःगु छगू करोड न्यय्स्वंगू लख राजस्व बुझे याःगु विभागं न्ह्यथंगु दु ।
नां सार्वजनिक याःगुमध्ये गुलिसिनं धाःसा विवरण पेश यायेगु ई बीत माग याःगु दुसा गुलिसिनं ज्याकुथिइ सम्पर्क तयेत धाःगु दु । सम्पर्क तःमवःपिं नं आपालं दुगु विभागं जानकारी बिउगु दु ।
येँ महानगरपालिका राजस्व विभागं न्हापांगु चरणय् नीस्वम्ह करदाताया नां सार्वजनिक यायेगु तयारी याःगु खः । नां सार्वजनिक यायेगु तयारी याना च्वँच्वं अन्तिम इलय् वयाः स्वंगू कम्पनीं कर पुलेगु प्रतिवद्धता प्वंकूगु खःसा मेगु नीगूया नां सार्वजनिक याःगु खः ।
थुकथं येँ महानगरयात बुझे यायेमाःगु राजस्व बुझे याःगु व्यापारिक प्रतिष्ठानय् युनाइटेड बिल्डर्स इण्ड इन्जिनियरिङ, नेशनल हस्पिटल प्रा. लि. सहिद मेमोरियल हस्पिटल, न्यूरोड टीम (एनआरटी) क्लब खः । थुकीमध्ये दकलये अप्वः युनाइटेडं छगू करोड तका राजस्व बुझे याःगु दुसा थुकिया प्रबन्ध निर्देशक सन्दीप हिराचनं वइगु नीन्हुया दुने सम्पत्तिया मूल्यांकन यानाः कर दाखिला यायेगु जुइ धासें विभागय् निवेदन बियादीगु दु ।
अथे हे येँ महानगरपालिका वडा नं. १४ य् च्वंगु नेशनल हस्पिटलं २४ गू लख, सहिद मेमोरियल अस्पतालं १९ गू लख राजस्व वापतया ध्यबा दाखिला याःगु दु । थुपिं निगुलिं अस्पतालं नां सार्वजनिक याये न्ह्यः हे विभागय् सम्पर्क तयाः कर पुलेगु प्रतिवद्धता प्वंकूगु खँ सीदुगु दु । एनआरटी क्लबं नं १० गू लख दाखिला यानाः ल्यं दुगु ध्यबा याकनं पुलेगु प्रतिवद्धता प्वंकूगु दु ।
येँ महानगरं वंगु असार १६ गते सम्पत्ति कर बुझे मयाःपिं तःधंगु करदाताया नां सार्वजनिक यासें ३० न्हुया दुने सम्पर्कय् वयेत इनाप याःगु खः । सुचं सार्वजनिक यायेधुंकाः लिपांगु इलय् तक नं सम्पर्कय् मवयेवं करदाताया कार्यस्थलय् हे वनाः सम्पर्क मवल धाःसा शिलबन्दी यायेगु जुइ धासें माइकिङ तकं याःगु खः ।
LEAVE YOUR COMMENTS