तःधंगु पार्टीइ मिसा–मिजं विवाद

विदेशी भौ व जिलाजंयात गज्याःगु नागरिकता ?

येँ – सदनय् विवाद जुयाः थानाच्वंगु नागरिकता विधेयकयात कयाः नेपाली कांग्रेस दुने मिसा व मिजंया लैंगिक विवाद समेत पिहां वःगु दु ।
थ्व नागरिकता विधेयकय् दकलय् अप्वः विवाद जुयाच्वंगु छगू धारा इहिपा यानाः हःपिं विदेशी मिसा व मिजंयात गुलि अवधिया दुने नेपाली नागरिकता बीगु धइगु खः ।

विधेयकय् सरकारं नेपाली मिजनं इहिपा याना हःम्ह विदेशी मिसायात ७ दँ लिपा नागरिकता बीगु व नेपाली मिसां इहिपा याना हःम्ह विदेशी मिजंयात १५ दँ लिपा जक नागरिकता बीगु धकाः प्रस्ताव यानातःगु दु । नेपाली कांग्रेसं थ्व प्रावधानया विरोध यासें थ्व अवधि तोके याये मदइगु अडान काःगु दु ।

तर कांग्रेस दुने हे च्वंपिं छुं सांसदतय्सं धाःसा सरकारं हःगु प्रावधान ठीक दु धासें पार्टी दुने लबिङ यानाच्वंगु दु । थ्व सांसदतय्सं कांग्रेस दुने कडा रुपं खँ तइपिं मिसापिं सांसदतय्त समेत विधेयकया विरोध याये मते धकाः ब्वः बीगु ज्या यानाच्वंगु खँ सीदुगु दु ।

खास यानाः आः नकतिनि हे सांसदपिं डिला संग्रौला व मीना पाण्डेयात मिजं सांसदत बालकृष्ण खाँड व देवेन्द्रराज कँडेलं थज्याःगु प्रावधान मतल धाःसा देश स्यनी धासें थुकी न्वमवायेत ‘सुझाव’ बिउगु खँ पिहां वःगु दु । बिना अवधि नागरिकता बीमाः धाइपिं डलरपाखें सञ्चालित खः धकाः तकं उमिसं द्वपं बीगु यानाच्वंगु दु ।

अवधि मतसे नागरिकता बीमाः धाइपिंत डलरवादी धाल धकाः पार्टी दुने हानं मेगु विवाद पिहां वःगु खँ सूत्रं धाःगु दु । पार्टीया वरिष्ठ नेता रामचन्द्र पौडेलं समेत बिना अवधि नागरिकता बिल धाःसा देशय् मेगु कथंया संकट वइ धासें चाःहीकाः विधेयकया समर्थन यानाच्वंगु खँ धाःगु दु । तर वय्कः खुलेजुयाः पिहां वःगु धाःसा मदुनि ।

अडान मत्वःतेत देउवाया उजं
पार्टी सभापति शेरबहादुर देउवां सरकारं हःगु विधेयकया विरोध यासें थौंकन्हय् थें हे बिना अवधि विदेशी भौ व जिलाजंयात नागरिकता बीमाःगु अडान कयादीगु दु । कांग्रेसं विदेशी भौमस्तय्त बिना अवधि नागरिकता बिउसां जिलाजंया हकय् धाःसा थःपिं मौन च्वनेगु नीति काःगु खँ नं सीदुगु दु ।

पार्टी दुने विधेयकया पक्षय् वनीपिं सांसदत नं पिहां वःगुलिं सभापति देउवां थज्याःगु ह्वीप जारी यानादीगु खँ नं सीदुगु दु । विदेशी भौ व जिलाजंयात गय् यानाः नागरिकता बीगु धइगु सवालय् थौंकन्हय् कांग्रेस व नेकपा दुने थवंथः हे मिसा व मिजं सांसदतय् दथुइ मनमुटाव समेत ब्वलनाच्वंगु खँ नं सीदुगु दु ।

सम्बन्धित बुखँ

LEAVE YOUR COMMENTS