नेवाः पत्रकारपाखें सञ्चार मन्त्रीयात ज्ञापन

येँ (नेपालभाषा टाइम्स)- नेवाः पत्रकार राष्ट्रिय दबुलिं संचार तथा सूचना प्रविधि मन्त्री रेखा शर्मायात नापलानाः नेपाल टेलिभिजनय् नेवाः भासं नं समाचार प्रशारणया याकेत इनाप याःगु दु । नेपाल टेलिभिजनं नकतिनि तामाङ व लिम्बु भाषां समाचार प्रसारण जुइधुंकूगु दु ।

दबूया अध्यक्ष नृपेन्द्रलाल श्रेष्ठया नेतृत्वय् वंगु पुचलं मन्त्री शर्माया लःल्हाःगु ध्यानाकर्षणय् मातृभाषा पत्रकारिताया विकास र विस्तारया लागि राज्यपाखें थप सहुलियत, सुविधयात नीतिगत रुपं सम्बोधन यायेमाःगु माग नं यानातःगु दु ।

अथे हे न्हापांम्ह मातृभाषी पत्रकार धर्मादित्य धर्माचार्ययात राज्यस्तरपाखें हे मान्यता बीमाःगु माग नं मन्त्रीयात याःगु दु । उगु इलय् नायः श्रेष्ठं नेपालय् मातृभाषां पत्रकारिताया शुरुआत जूगु सछिदँ क्यनेत्यंगु जानकारी यासें न्हापांम्ह मातृभाषी पत्रकार धर्मादित्य धर्माचार्ययात राज्यपाखें नं मान्यता बीत माग यानादीगु खः ।

नेवाः पत्रकार राष्ट्रिय दबुलिं नेपाल आदिवासी जनजाति पत्रकार महासंघलिसे समन्वय यासें धर्मादित्य धर्माचार्यया बुन्हि बुद्धजयन्तीया न्ह्यव कुन्हु न्हय्दँ न्ह्यवंनिसें मातृभाषा पत्रकारिता दिवसया रुपय् न्यायेका वयाच्वनागु जानकारी यासें आः नेपाल संवत् ११४४ अर्र्थात् आकिवं २०८० साल कार्तिकंनिसें मेगु दँयात कार्तिकतक मातृभाषा पत्रकारिता शताब्दी महोत्सव न्यायेके त्यनागु खँ नं कनादिल ।