‘चिनियाँ राजदूतया सक्रियता अस्वाभाविक’

येँ (नेपालभाषा टाइम्स) – नेपाल कम्युनिष्ट पार्टी (नेकपा) दुने पार्टीया विवाद तच्वया वयेवं समस्या ज्यंकेगु निंतिं चिनियाँ राजदूत होउ यान्छी सक्रिय जुयाः नेकपाया नेतातय्त नापलायेगु ज्या यानाच्वंगु दुसा उकियात कयाः राजनीतिक विश्लेषकपिंसं धाःसा विरोध याःगु दु ।

नेकपाया विवाद तच्वयाः वनेवं चिनियाँ राजदूत यान्छीं दकलय् न्हापां नेकपाया विदेश विभाग प्रमुख माधवकुमार नेपालयात वंगु आइतवाः नापलाःगु खःसा म्हिगः वरिष्ठ नेता झलनाथ खनाल लिसे नापलानाः सहलह यानादीगु खः । नेकपाया नेतातय्सं थुकथं चिनियाँ राजदूत नापलाःगु खँयात कयाः राजनीतिक विश्लेषक राजेन्द्र महर्जनं विदेशी हस्तक्षेप जूगु धासें असन्तुष्टि प्वंकादीगु दु।

वय्कलं ‘नेपालभाषा टाइम्स’ लिसे खँ ल्हासें धयादिल, ‘नेपाःया राजनीतिइ गुगुं नं देय्या राजदूतं हस्तक्षेप यायेगु उचित मखु, सुं नं विदेशी राजदूतं नेपाःमियात नापलाये मालधाःसा उकिया जानकारी दकलय् न्हापां परराष्ट्र मन्त्रालययात बीमाः, परराष्ट्र मन्त्रालयया प्रतिनिधि तयाः जक नेपाःमियात नापलायेमाःगु खः, तर थन थ्व जुयाच्वंगु मदु, अझ विशेष यानाः छगू पार्टी दुने ब्वलंगु विवादयात कयाः राजदूत सक्रिय जुइगु झन हे पाय्छि मखु।’

न्हापा न्हापा चिनियाँ राजदूतपिंसं नेपालय् थज्याःगु भूमिका म्हितेगु मयाः, आः वयाः धाःसा राजदूत थः हे सक्रिय जुयाच्वुं दु। थुकियात कयाः वय्कःया बिचाः दु, ‘चीन आर्थिक रुपं महाशक्ति राष्ट्र जुइधुंकल, आः राजनीतिक रुपं नं महाशक्ति जुइगु ल्याखं थज्याःगु भूमिका म्हिताच्वंगु जुइफु।’

वय्कलं चीनय् नं हबकब व उइगुर समस्यायात नेपालं ल्ह्वन धाःसा उकियात चीनं गुकथं काइ धइगु न्ह्यसः थनादिसें चिनियाँ राजदूतया सक्रियता अनुचित जूगु खँ धयादीगु दु । वय्कलं चिनियाँ कम्युनिष्ट पार्टी व नेकपा दथुइ भाइचारा सम्बन्ध दुगुलिं जक चिनियाँ राजदूतं थज्याःगु भूमिका म्हितूगु खःला धइगु शंका नं प्वंकादिल ।

न्हापा भारतीय राजदूततय्सं थुकथं हे नेपाःया राजनीतिइ हस्तक्षेप याइगुलिं आपालं विरोध जुइगु खः । अथे हे आः चिनियाँ राजदूतया सक्रिय जूबलय् छाय् थज्याःगु न्ह्यसः मवःगु धयागु न्ह्यसलय् वय्कलं धयादी, ‘न्हापा थःगु अनुकूल जूगु इलय् भारतीय राजदूतं न्ह्याःगु धाःसां पाय्छि, आः चिनियाँ राजदूतं म्हिताच्वंगु नं सत्तारुढ पार्टीया नेतातय् अनुकूल जुयाच्वंगुलिं विरोध मजूगु खः ।’

वय्कलं देय्या सार्वभौमयात हस्तक्षेप यायेगु कथं जुइगु वैदेशिक हस्तक्षेपयात स्वीकार यायेगुलिइ नेपाःया नेतातय् हे कमजोरी दुगु धासें परराष्ट्रया आचार संहितयात जक पालना यायेगु खःसा वैदेशिक हस्तक्षेप मजुइगु बिचाः तयादी । ‘न्हापा नं भारत, अमेरिकी राजदूततय्सं नेपाःया नेतातय्त तप्यंक नापलायेगु यानाच्वंगु दु, थ्व सिस्टमयात फलो मयाःगुया लिच्वः खः’, वय्कःया धापू दु ।

उकथं हे नेवाः न्ह्यलुवा लिसे मानवअधिकारवादी नेता मल्ल के. सुन्दरं चिनियाँ राजदूतं सामान्य सम्पर्क तइगु खँ स्वाभाविक खः तर नेपाःया राजनीति तरल जुयाच्वंगु इलय् राजदूतया सक्रियता पाय्छि मजूगु खँ धयादीगु दु ।

वय्कलं नं परराष्ट्र मन्त्रालयया स्वीकृति मकासे राजनीतिक नेतातय् छेँय् छेँय् वनाः नापलायेगु ज्या कुटनीतिक मर्यादा अःखः जूगु खँ धयादीगु दु। भारतीय राजदूतं नेपाःया नेतातय्त नापलात धाःसा आपालं विरोध जुइगु याः तर चिनियाँ राजदूत सक्रिय जुयाः नेतातय्त नापलायेगु पाय्छि खः कि मखु धयागु न्ह्यसलय् वय्कलं धयादी, ‘नेपाःमितय्के छगू कथंया साइकोलोजी दु, भारत धालकि विरोध यायेमाः, तर चिनियाँ धाःसा भाइचारा सम्बन्ध दुम्ह बांलाःम्ह मित्र धायेगु यानाच्वंगु दु, थुकिं थ्वहे संर्कीणतां ज्या यानाच्वंगु दु ।’

अथे हे राजनीतिक विश्लेषक श्याम श्रेष्ठं नं चिनियाँ राजदूतं नेपाःया नेतातय्त नापलाःगु ज्या स्वाभाविक मजूगु खँ धयादीगु दु। वय्कलं नं नेपाःया नेतातय्सं हे परराष्ट्र मन्त्रालयया आचारसंहितायात ध्यान मबिउगु धासें थुकी नेपाःया हे नेतातय्गु कमजोरी दुगु खँ धयादिल । वय्कलं नेपाःया सुं नं व्यक्तियात नाप लायेत परराष्ट्र मन्त्रालयया प्रतिनिधि दयेमाः धासें अज्याःपिं प्रतिनिधिं अन छु गज्याःगु खँ जूगु खँ धइगु रेकर्ड तयेमाः । तर थ्व ज्या जुयाच्वंगु मदु ।

वय्कलं ‘नेपालभाषा टाइम्स’ लिसे खँ ल्हायेगु झ्वलय् धयादी, ‘चिनियाँ राजदूतं थःगु भाइचारा दुगु पार्टीया तज्याइन धकाः गुगु चिउताः क्यनाः पार्टी तछ्याये मजिउ धकाःसुझाव बिउगु दु, थ्व पाय्छि खः, तर थ्वयात हे प्रधानमन्त्री, मन्त्री दयेकेमाः धकाः धायेगु पाय्छि मखु, पार्टी तज्यात धाःसा देय्यात गुलि लिच्वः लाकी, उकिं पार्टी तछ्याये मजिउ धकाः बिउगु सुझावयात झीसं बांलाःगु हे तायेकेमाः ।’

थ्व स्वयां लछि न्ह्यः नं नेकपा दुने विवाद ब्वलंगु खःसा उगु इलय् नं चिनियाँ राजदूत वान्छी सक्रिय जुइवं नेकपा दुनेया विवाद साम्य जूगु खः ।

सम्बन्धित बुखँ

LEAVE YOUR COMMENTS